50 வயதுக்கு உட்பட்டோருக்கு அதிகரிக்கும் புற்றுநோய் ஆபத்து: உலக புற்றுநோய் ஆராய்ச்சி நிதியம் அதிர்ச்சி தகவல்
செய்தி முன்னோட்டம்
உலக புற்றுநோய் ஆராய்ச்சி நிதியம் நடத்திய சமீபத்திய ஆய்வில், இங்கிலாந்து, அமெரிக்கா மற்றும் நெதர்லாந்து ஆகிய நாடுகளில் 50 வயதுக்கு உட்பட்ட இளைஞர்கள் மற்றும் நடுத்தர வயதினரிடையே புற்றுநோய் பாதிப்பு கணிசமாக அதிகரித்து வருவது கண்டறியப்பட்டுள்ளது. இங்கிலாந்தில் 7 வகையான புற்றுநோய்களும், அமெரிக்காவில் 5 வகைகளும், நெதர்லாந்தில் 4 வகையான புற்றுநோய்களும் 50 வயதுக்கு உட்பட்டோரிடம் வேகமாக அதிகரித்து வருகின்றன. இங்கிலாந்தில் புரோஸ்டேட் புற்றுநோய் பாதிப்பு 2001 ஆம் ஆண்டில் 1,00,000 பேருக்கு ஒருவர் என்ற விகிதத்தில் இருந்தது, 2023 இல் 3.6 ஆக உயர்ந்துள்ளது. அதேபோல, அமெரிக்காவில் சிறுநீரகப் புற்றுநோய் பாதிப்பு இரட்டிப்பாக அதிகரித்துள்ளதாகத் தரவுகள் தெரிவிக்கின்றன.
காரணம்
வாழ்வியல் மாற்றங்களே முதன்மை காரணம்
உடல் பருமன், சத்துக்களற்ற உணவுப் பழக்கம், உடற்பயிற்சியின்மை போன்ற மோசமான வாழ்வியல் முறைகளே இளைஞர்களிடையே புற்றுநோய் அதிகரிக்க முக்கியக் காரணங்களாக நிபுணர்களால் சுட்டிக்காட்டப்படுகின்றன.
மேலும், நவீனப் பரிசோதனை முறைகள் மற்றும் விழிப்புணர்வு காரணமாக நோயை ஆரம்பக்கட்டத்திலேயே கண்டறிவதும் இந்த எண்ணிக்கை உயர்வுக்கு மற்றொரு காரணமாகும்.
இள வயதினரிடையே புற்றுநோய் பாதிப்பு அதிகரித்து வந்தபோதிலும், 50 வயதுக்குக் கீழ் உள்ளவர்களுக்குப் புற்றுநோய் ஏற்படுவதற்கான ஒட்டுமொத்த சாத்தியக்கூறு இன்னும் குறைவாகவே உள்ளது.
புற்றுநோயால் பாதிக்கப்படுபவர்களின் சராசரி வயது 60-க்கு மேல் தான் உள்ளது என்றும், ஆரோக்கியமான வாழ்வியல் முறையைப் பின்பற்றுவதன் மூலம் இதன் ஆபத்தைக் குறைக்கலாம் என்றும் மருத்துவர்கள் தெளிவுபடுத்தியுள்ளனர்.