8 ஆண்டுகாலப் பயணத்திற்கு பின் புதன் கிரகத்தை அடைந்த பெபிகொலம்போ; விண்வெளித் துறையில் புதிய மைல்கல்
செய்தி முன்னோட்டம்
சூரிய குடும்பத்தில் உள்ள மிகச்சிறிய மற்றும் சூரியனுக்கு மிக அருகில் அமைந்த புதன் கிரகத்தை ஆராய்ச்சி செய்வதற்காக அனுப்பி வைக்கப்பட்ட பெபிகொலம்போ விண்கலம், 8 ஆண்டுகால நீண்ட விண்வெளிப் பயணத்திற்குப் பிறகு தனது இலக்கை அடைந்துள்ளது. ஐரோப்பிய விண்வெளி முகமை மற்றும் ஜப்பான் விண்வெளி ஆய்வு முகமை இணைந்து உருவாக்கிய இந்த விண்கலம், கடந்த 2018 ஆம் ஆண்டு அக்டோபர் மாதம் வெற்றிகரமாக விண்ணில் செலுத்தப்பட்டது. இதுவரை சுமார் 600 கோடி மைல்கள் கடந்து விண்கலம் புதனை எட்டியுள்ளது.
சவால்கள்
சிக்கலான சுற்றுப்பாதை மாற்றமும் தொழில்நுட்ப சவால்களும்
புதன் கிரகத்தின் ஈர்ப்பு விசையினைக் கருத்தில் கொண்டு, விண்கலத்தின் வேகத்தைக் கட்டுப்படுத்திச் சரியான சுற்றுப்பாதையில் செலுத்துவது விண்வெளி விஞ்ஞானிகளுக்குப் மிகப்பெரிய சவாலாக உருவெடுத்துள்ளது.
இதற்காகப் பூமி, வெள்ளி மற்றும் புதன் ஆகிய கோள்களின் ஈர்ப்பு விசை உதவியுடன் 9 முறை அதன் பாதை வெற்றிகரமாக மாற்றியமைக்கப்பட்டது.
தற்போது விண்கலத்திலிருந்து மின்சார உந்துதல் தொகுதி தனியாகப் பிரிக்கப்பட்டு, இரண்டு பிரதான ஆய்வு விண்கலங்கள் புதனின் சுற்றுப்பாதையில் நிலைநிறுத்தப்பட உள்ளன.
செயல்பாடு
இரண்டு அதிநவீன ஆய்வு விண்கலங்களின் செயல்பாடு
இந்தத் திட்டத்தில் எம்.பி.ஓ (MPO) மற்றும் எம்.ஐ.ஓ (MIO) என பெயரிடப்பட்ட இரு வேறு விண்கலங்கள் இணைந்து செயல்பட உள்ளன.
இதில் எம்.பி.ஓ விண்கலம் புதன் கிரகத்தின் நிலப்பரப்பு மற்றும் அமைப்பை விரிவாக ஆய்வு செய்யும்.
மற்றொரு விண்கலமான எம்.ஐ.ஓ புதனின் காந்தமண்டலம் மற்றும் அதைச் சுற்றியுள்ள வாயு மண்டலங்களை தீவிரமாக ஆராயும். இந்த இரண்டு விண்கலங்களும் தனித்தனியாகப் பிரிக்கப்பட்டுத் தங்களது ஆய்வுப் பணிகளை வரும் ஏப்ரல் மாதம் முதல் முழு வீச்சில் அதிகாரப்பூர்வமாகத் தொடங்கும்.
பிரபஞ்ச ரகசியம்
புதன் கிரகத்தின் விசித்திர பள்ளங்களும் பிரபஞ்ச ரகசியங்களும்
சூரியனுக்கு மிக அருகில் இருப்பதால் புதனின் மேற்பரப்பு வெப்பநிலை 800 டிகிரி ஃபாரன்ஹீட் வரை உயர்கிறது.
கடுமையான வெப்பநிலையைத் தாங்கும் வகையில் இந்த விண்கலங்கள் பிரத்யேகமாக வடிவமைக்கப்பட்டுள்ளன.
புதன் கிரகத்தின் தோற்றம், அதன் அதிகப்படியான அடர்த்தி மற்றும் அங்குள்ள விசித்திரமான பள்ளங்கள் எவ்வாறு உருவாயின போன்ற பல தசாப்த கால விண்வெளி கேள்விகளுக்கு இந்த பெபிகொலம்போ ஆய்வுத் திட்டம் புதிய மற்றும் தெளிவான விடைகளை வழங்கும் என்று சர்வதேச விண்வெளி விஞ்ஞானிகள் பெரிதும் எதிர்பார்க்கின்றனர்.