டொனால்ட் டிரம்பைப் போல தினமும் ஆஸ்பிரின் சாப்பிட்டால் என்ன ஆகும்? மருத்துவர்கள் எச்சரிக்கை
செய்தி முன்னோட்டம்
அமெரிக்க அதிபர் டொனால்ட் டிரம்ப், தான் கடந்த 35 ஆண்டுகளுக்கும் மேலாகத் தினமும் அதிக வீரியமுள்ள ஆஸ்பிரின் மாத்திரையை உட்கொண்டு வருவதாகத் தெரிவித்துள்ளார். மருத்துவர்கள் குறைந்த அளவிலான (80 mg) மாத்திரையைப் பரிந்துரைத்தபோதிலும், தாம் 386 mg கொண்ட பெரிய மாத்திரையையே சாப்பிட்டு வருவதாகக் கூறியுள்ளார். ஆஸ்பிரின் வலி நிவாரணியாகவும் இரத்த மெலிதாக்கியாகவும் செயல்பட்டாலும், தினமும் சாப்பிடுவது உடலுக்குப் பல்வேறு ஆபத்துகளை விளைவிக்கும் என மருத்துவர்கள் எச்சரிக்கின்றனர்.
ரத்தப் போக்கு
மாரடைப்புத் தடுப்பும் தீவிர ரத்தப்போக்கு அபாயமும்
ஆஸ்பிரின் மாத்திரையானது ரத்த தட்டுக்களை ஒன்றோடொன்று இணைய விடாமல் தடுத்து, ரத்தக் கட்டிகள் உருவாகாமல் பாதுகாக்கிறது.
இதனால் ஏற்கெனவே மாரடைப்பு அல்லது பக்கவாதத்தால் பாதிக்கப்பட்டவர்களுக்கு மீண்டும் அத்தகைய பாதிப்புகள் வராமல் தடுக்க இது உதவுகிறது.
இருப்பினும், இது ரத்தத்தின் உறைதல் திறனைக் குறைப்பதால், சிறிய காயங்கள் ஏற்பட்டாலும் அதிகளவில் ரத்தப்போக்கு உண்டாகும்.
மேலும், வயிறு, குடல் மற்றும் மிக அரிதாக மூளையின் உள்ளேயும் ஆபத்தான உள் ரத்தப்போக்கை ஏற்படுத்தக்கூடிய அபாயம் இதில் உள்ளது.
செரிமானம்
வயிற்றுப் புண்கள் மற்றும் செரிமானக் கோளாறுகள்
தினமும் தொடர்ச்சியாக ஆஸ்பிரின் மாத்திரைகளை உட்கொள்வது வயிற்றின் உட்புற சவ்வுகளைப் பாதுகாக்கும் அமில சமநிலையைப் பாதிக்கின்றது.
இதனால் நெஞ்செரிச்சல், செரிமானக் கோளாறு, வாந்தி மற்றும் கடுமையான வயிற்றுப் புண்கள் ஏற்படக்கூடும்.
தீவிரமான சூழ்நிலைகளில் குடலில் ஏற்படும் ரத்தப்போக்கு காரணமாக வாந்தியில் ரத்தம் வருதல் அல்லது மலம் கருப்பு நிறமாக மாறுதல் போன்ற அறிகுறிகள் தோன்றும்.
குறிப்பாக 70 வயதிற்கு மேற்பட்ட முதியவர்கள் முதல்முறையாக மாரடைப்பைத் தடுக்க ஆஸ்பிரின் சாப்பிடுவதைத் தவிர்க்க வேண்டும் என அறிவுறுத்தப்படுகிறது.
யாரெல்லாம் சாப்பிடலாம்?
மருத்துவர்களின் ஆலோசனை
ஆஸ்பிரின் மாத்திரையை ஒரு சாதாரண தினசரி பழக்கமாக மாற்றக் கூடாது என இதய நோய் நிபுணர்கள் வலியுறுத்துகின்றனர்.
ஏற்கெனவே மாரடைப்பு வந்தவர்கள், ஸ்டென்ட் வைத்தவர்கள் மட்டுமே மருத்துவரின் தீவிரக் கண்காணிப்பின் கீழ் இதனை உட்கொள்ள வேண்டும்.
எவ்வித இதய நோய்ப் பின்னணியும் இல்லாதவர்கள், மாரடைப்பு வராமல் தடுப்பதற்காகத் தானாக முன்வந்து ஆஸ்பிரின் சாப்பிடுவது நன்மையை விடப் பெரும் ஆபத்தையே தரும்.
எனவே, எந்தவொரு புதிய மருந்தையும் தொடங்கும் முன் தகுந்த மருத்துவ ஆலோசனையைப் பெறுவது அவசியமாகும்.