இந்தியாவின் முதல் கிறிஸ்துமஸ் கேக் கேரளா பேக்கரியில் செய்யப்பட்டது என்பது உங்களுக்குத் தெரியுமா?
செய்தி முன்னோட்டம்
டிசம்பர் என்றாலே விடுமுறை காலம் தான். கிறிஸ்துமஸ், புத்தாண்டு என மாதத்தின் துவக்கத்திலேயே கொண்டாட்டங்கள் களைகட்ட துவங்கிவிடும்!
நகரம் முழுக்க ஒளிரும் வண்ண விளக்குகளின் பிரகாசங்கள், வீட்டில் தொங்கும் நட்சத்திர விளக்குகள், கிறிஸ்துமஸ் குடில்கள் என கிறிஸ்துமஸ் கொண்டாட மக்கள் தயாராகி வரும் நேரத்தில், கிறிஸ்துமஸ் என்றாலே பலருக்கும் நினைவிற்கு வருவது கேக் தான்.
குறிப்பாக பிளம் கேக்! ஒரு சில இடங்களில் பிளம் கேக் தயாரிப்பதை கொண்டாட்டத்தின் ஒரு மரபாகவே வைத்துள்ளனர்.
வரலாறு
கிறிஸ்மஸ் கேக்கின் வரலாறை தெரிந்து கொள்ளுங்கள்
கிறிஸ்மஸ் கேக் பாரம்பரியம் பண்டைய ரோமில்(கிமு 133-31) தொடங்கியதாக அறியப்படுகிறது.
அங்கு, சாட்டர்னாலியா பண்டிகையின்போது, மக்கள் பார்லி மாஷ், மாதுளை விதைகள், நட்ஸ் மற்றும் திராட்சையும் கொண்டு செய்யப்பட்ட இனிப்பு ரொட்டியை விரும்புவார்கள்.
சாட்டர்னேலியா என்பது ஆரம்ப காலங்களில் அறுவடை பண்டிகையாக கொண்டாடப்பட்டது.
இடைக்கால ஐரோப்பாவில், படிப்படியாக, கிறிஸ்துமஸின் போது பணக்காரர்களும், அதிகாரத்தில் இருப்பவர்களும் கொண்டாடத்துவங்கினர்.
பழங்கள் நிறைந்த கேக்குகளை பேக் செய்யும் பாரம்பரியம் அப்போதுதான் வடிவம் பெறத் தொடங்கியது.
இந்த காலகட்டத்தில் ஜாதிக்காய், இலவங்கப்பட்டை மற்றும் கிராம்பு போன்ற மசாலாப் பொருட்கள் அறிமுகப்படுத்தப்பட்டன.
அவை கிழக்கு பிராந்தியத்திலிருந்து ஐரோப்பாவிற்கு கொண்டு வரப்பட்டன.
ஆடம்பரமாகக் கருதப்பட்ட இந்த பொருட்கள், உலர்ந்த பழங்களுடன் சேர்த்து சிறியளவில் பயன்படுத்தப்பட்டு, கிறிஸ்துமஸ் கேக்கை விரும்பத்தக்க விருந்தாக மாற்றியது.
இந்திய அறிமுகம்
பிளம் கேக்குகளின் இந்திய தோற்றம்
ஐரோப்பியர்கள் புதிய பிரதேசங்களை காலனித்துவப்படுத்தி, பயணங்களை மேற்கொண்டபோது, அவர்கள் நேசத்துக்குரிய கிறிஸ்துமஸ் கேக் உட்பட தங்கள் பாரம்பரியங்களை எடுத்துச் சென்றனர்.
இந்தப் புதிய நிலங்களில் கிடைக்கும் பொருட்களின் அடிப்படையில் இந்த மரபுகள் அடிக்கடி மாற்றப்பட்டன.
அப்படிதான் இந்தியாவிற்கும் கிறிஸ்துமஸ் கேக் அறிமுகம் செய்யப்பட்டது.
தலச்சேரியில் தான் முதல் இந்திய கிறிஸ்துமஸ் கேக் செய்யப்பட்டது தெரியுமா?
மாம்பள்ளி பாபு என்பவர் கேரளாவில் உள்ள தலச்சேரியில் ராயல் பிஸ்கட் என்ற பெயரில் பேக்கரியை நடத்தி வந்தார்.
1883இல், முர்டோக் பிரவுன் என்ற ஒரு பிரிட்டிஷ் தோட்டக்காரர், இங்கிலாந்திலிருந்து ஒரு பணக்கார பிளம் கேக்கைக் கொண்டு வந்து, அதேபோல மீண்டும் உருவாக்க பாபுவிடம் கேட்டார்.
அந்த வாய்ப்பைப் பயன்படுத்திக் கொண்ட பாபு, அதன் பின்னர் தயாரித்ததுதான் வரலாறு.
தயாரிப்பு
முதல் தயாரிப்பு நடந்தது எப்படி?
பிரிட்டிஷ் தோட்டக்காரர் தந்த வழிகாட்டுதல் படியும், பாபு தன்னுடைய அனுபவத்தையும் இணைத்து கோகோ, பேரீச்சம்பழம், திராட்சைகள் மற்றும் வைன் உள்ளிட்டவைகளுடன் உள்ளூர் மசாலாப் பொருட்களை சேர்த்து, ஆப்பிளில் இருந்து பெறப்பட்ட கஷாயத்தை பயன்படுத்தி தயார் செய்தார்.
டிசம்பர் 20, 1884இல், பாபு தனது தலைசிறந்த முதல் படைப்பை வெளியிட்டார்.
அது மெருகூட்டப்பட்ட பாரம்பரியமான சுவைக்காகவும் பிரவுனின் ஒப்புதல் பெற்றதும், கேக்கின் புகழ் உயர்ந்தது, பாபுவின் பேக்கரி செழித்தது.
இந்த வெற்றியானது கேரளாவில் ஒரு செழிப்பான குடும்ப வணிகத்திற்கு அடித்தளம் அமைத்தது. தற்போது பாபுவின் சந்ததியினர் கேரளா முழுவதும் புகழ்பெற்ற பேக்கரி சங்கிலிகளை நிறுவியுள்ளனர்.