வெளிநாடு போறீங்களா? இந்த நாடுகளுக்கு ட்ராவல் இன்சூரன்ஸ் இல்லைனா நோ என்ட்ரி! கட்டாய விதிகள்
செய்தி முன்னோட்டம்
முன்பெல்லாம் வெளிநாடுகளுக்கு சுற்றுலா செல்பவர்கள், தங்களது லக்கேஜ் தொலைந்து போனால் அல்லது ஏதேனும் அவசர மருத்துவ உதவி தேவைப்பட்டால் மட்டுமே ஒரு பாதுகாப்புக்காக ட்ராவல் இன்சூரன்ஸ் (Travel Insurance) எடுப்பார்கள். ஆனால், தற்பொழுது சர்வதேசப் பயண விதிகள் முற்றிலுமாக மாறிவிட்டன. உலகிலுள்ள பல முன்னணி நாடுகள் தங்களது நாட்டிற்குள் சுற்றுலாப் பயணிகள் நுழைவதற்கோ அல்லது விசா வழங்குவதற்கோ முறையான ட்ராவல் இன்சூரன்ஸை சட்டப்படி கட்டாயமாக்கியுள்ளன.
முக்கியத்துவம்
ஏன் ட்ராவல் இன்சூரன்ஸ் இவ்வளவு முக்கியம்?
வெளிநாடுகளில் திடீரென ஏற்படும் மருத்துவ அவசரநிலைகள், விபத்துக்கள், விமானப் போக்குவரத்து ரத்து மற்றும் உடைமைகள் காணாமல் போதல் போன்ற இக்கட்டான சூழ்நிலைகளில் இது ஒரு நிதியியல் பாதுகாப்பு வளையமாக செயல்படுகிறது. குறிப்பாக, பட்ஜெட் பயண மேற்கொள்பவர்கள் அந்நிய நாட்டில் எதிர்பாராத பெரிய மருத்துவ செலவுகளால் பாதிக்கப்படுவதைத் தடுக்கவே பல நாட்டு அரசாங்கங்கள் இந்த விதியைக் கண்டிப்பாகப் பின்பற்றுகின்றன.
ட்ராவல் இன்சூரன்ஸ்
ஐரோப்பிய நாடுகள்
ஐரோப்பாவில் உள்ள பிரான்ஸ், ஸ்பெயின், இத்தாலி, ஜெர்மனி மற்றும் சுவிட்சர்லாந்து உள்ளிட்ட ஷெங்கன் மண்டல நாடுகளுக்கு நீங்கள் செல்ல விரும்பினால், இன்சூரன்ஸ் இல்லாமல் விசா பெறவே முடியாது. அங்குப் பயணிப்பவர்கள் குறைந்தபட்சம் €30,000 யூரோ மதிப்புள்ள மருத்துவக் காப்பீட்டைக் கொண்டிருக்க வேண்டும் என்பது மிகக் கடுமையான விதியாகும். இதேபோல் மற்றொரு ஐரோப்பிய நாடான ருமேனியாவிற்கு விசா விண்ணப்பிக்கும் வெளிநாட்டுப் பயணிகள், ஷெங்கன் நாடுகளைப் போலவே குறைந்தபட்சம் €30,000 யூரோ மருத்துவக் கவரேஜ் கொண்ட இன்சூரன்ஸ் பாலிசியைச் சமர்ப்பிக்க வேண்டும். விசா ஒப்புதல் பெறுவதற்கு இந்த ஆவணம் மிக முக்கியப் பங்க வகிக்கிறது.
ட்ராவல் இன்சூரன்ஸ்
மத்திய கிழக்கு நாடுகள்
நீங்கள் துபாய் அல்லது அபுதாபிக்கு சுற்றுலா செல்லத் திட்டமிட்டால், செல்லுபடியாகும் ஹெல்த் இன்சூரன்ஸ் வைத்திருப்பது அவசியமாகும். துபாயில் மருத்துவச் செலவுகள் மிக அதிகம் என்பதால், விசா விண்ணப்பிக்கும் போதே இந்த இன்சூரன்ஸ் ஆவணம் இணைக்கப்பட்டு விடுகிறது. மேலும், அங்கு பாலைவன சவாரி போன்ற சாகச விளையாட்டுகளில் ஈடுபடக் கூடுதல் கவரேஜ் தேவைப்படும். இதேபோல், துருக்கி நாட்டிற்கு விசா விண்ணப்பிக்கும் போது, நீங்கள் தங்கும் ஒட்டுமொத்த நாட்களுக்கும் தேவையான மருத்துவக் காப்பீட்டு ஆதாரத்தை சமர்ப்பிக்க வேண்டியது அவசியமாகும். நீங்கள் விண்ணப்பிக்கும் விசாவின் வகையைப் பொறுத்து இந்த இன்சூரன்ஸ் விதிமுறைகள் சற்று மாறுபடலாம்.
ட்ராவல் இன்சூரன்ஸ்
கியூபா மற்றும் ஜார்ஜியா
கியூபா நாடு நீண்ட காலமாகவே தங்களது நாட்டிற்கு வரும் அனைத்து வெளிநாட்டு சுற்றுலாப் பயணிகளுக்கும் மருத்துவக் காப்பீட்டைக் கட்டாயமாக்கியுள்ளது. ஒருவேளை நீங்கள் அந்நாட்டிற்கு செல்லும்போது முறையான இன்சூரன்ஸ் ஆவணத்தைக் காட்டத் தவறினால், விமான நிலையத்திலேயே உள்ளூர் இன்சூரன்ஸ் பாலிசியை அதிக விலை கொடுத்து வாங்க வேண்டியிருக்கும். சுற்றுலா பயணிகளுக்கான இன்சூரன்ஸ் விதிமுறைகளைச் சமீபத்தில் பலப்படுத்தியுள்ள நாடுகளில் ஜார்ஜியாவும் ஒன்றாகும். தங்களது நாட்டிற்கு வரும் சுற்றுலாப் பயணிகள் தங்கும் காலத்தில் ஏற்படும் அவசர சிகிச்சை செலவுகளை அவர்களே ஏற்றுக்கொள்வதை உறுதி செய்யப் பிரத்யேக விபத்துக் காப்பீட்டை அந்நாட்டு அரசு தற்பொழுது கட்டாயமாக்கியுள்ளது.
ட்ராவல் இன்சூரன்ஸ்
நேபாள மலையேற்றம்
நேபாளத்திற்கு செல்லும் சாதாரண சுற்றுலாப் பயணிகளுக்கு இன்சூரன்ஸ் கட்டாயமில்லை என்றாலும், இமயமலையில் டிரெக்கிங் மற்றும் மலை ஏறுபவர்களுக்கு இது முற்றிலும் கட்டாயமாகும். மலைப் பகுதிகளில் அவசரக் கால ஹெலிகாப்டர் மீட்புப் பணிகளுக்கான செலவுகள் மிக அதிகம் என்பதால் இந்த விதிமுறை அமலில் உள்ளது. மொத்தத்தில், நீங்கள் எந்த நாட்டிற்கு சென்றாலும், விமான டிக்கெட்டுகளை புக் செய்யும் போதே அந்த நாட்டின் விசா விதிமுறைகளை முழுமையாகப் படித்து, அதற்கு ஏற்ற சரியான கவரேஜ் கொண்ட ட்ராவல் இன்சூரன்ஸை எடுத்து வைத்துக் கொள்வது உங்களது பயணத்தை எவ்விதத் தடங்கலும் இன்றி நிம்மதியானதாக மாற்றும்.