WFI பிரச்சனை: மல்யுத்த வீரர்களின் மனு உச்ச நீதிமன்றத்தில் இன்று விசாரணைக்கு வருகிறது
செய்தி முன்னோட்டம்
இந்திய மல்யுத்த சம்மேளனத்தின்(WFI) முன்னாள் தலைவர் பிரிஜ் பூஷன் சரண் சிங்குக்கு எதிராக FIR பதிவு செய்யக் கோரி மல்யுத்த வீராங்கனைகள் உச்ச நீதிமன்றத்தில் மனு தாக்கல் செய்திருந்தனர். அந்த மனுவை உச்ச நீதிமன்றம் இன்று(ஏப்-28) விசாரிக்க இருக்கிறது.
செவ்வாயன்று, மல்யுத்த வீராங்கனைகளின் மனுக்களை ஏற்றுக்கொண்ட உச்சநீதிமன்றம், டெல்லி காவல்துறைக்கு நோட்டீஸ் அனுப்பியது.
மல்யுத்த வீரர்கள் இது குறித்து டெல்லி காவல்துறையில் புகார் அளித்த போதிலும், டெல்லி காவல்துறை FIR பதிவு செய்யவில்லை என்று கூறப்படுகிறது.
இதனால், உச்ச நீதிமன்றத்தை அணுகிய 7 மல்யுத்த வீராங்கனைகள் FIR பதிவு செய்யக்கோரி மனு தாக்கல் செய்துள்ளனர். இந்த மனுக்களை உச்ச நீதிமன்றம் இன்று விசாரிக்க உள்ளது.
DETAILS
புகார் அளித்த போதிலும், டெல்லி காவல்துறை FIR பதிவு செய்யவில்லை
தலைசிறந்த மல்யுத்த வீரர்களான வினேஷ் போகட், பஜ்ரங் புனியா மற்றும் சாக்ஷி மாலிக் ஆகியோர் பிரிஜ் பூஷனுக்கு எதிராக டெல்லியில் பெரும் போராட்டத்தை நடத்தி வருகின்றனர்.
மல்யுத்த வீரர்களை பாலியல் வன்கொடுமை செய்ததாக பிரிஜ் பூஷன் சரண் சிங் மீது குற்றம்சாட்டப்பட்டுள்ளது.
பாஜக தலைவரான பிரிஜ் பூஷன் ஷரண் சிங், தற்போது, பாதிக்கப்பட்டவர்களை மிரட்டி வருவதாகவும் லஞ்சம் வழங்க முயற்சிப்பதாகவும் மல்யுத்த வீரர்கள் குற்றம் சாட்டி உள்ளனர்.
ஹரியானா முன்னாள் முதல்வரும், காங்கிரஸ் தலைவருமான பூபிந்தர் சிங் ஹூடா உள்ளிட்ட பல அரசியல் தலைவர்கள் போராடி வரும் மல்யுத்த வீரர்களுக்கு ஆதரவு தெரிவித்து வருவதால், இது இன்னும் பெரிய போராட்டமாக மாறி இருக்கிறது.