IB இன்டெல் முதல் சிக்னல் கண்காணிப்பு வரை: ஆபரேஷன் மஹாதேவ் வெற்றிகரமாக நடந்தது எப்படி?
செய்தி முன்னோட்டம்
ஏப்ரல் 22 ஆம் தேதி பஹல்காமில் 26 பேரைக் கொன்ற பயங்கரவாதிகள், திங்களன்று ஸ்ரீநகர் அருகே நடந்த கூட்டு நடவடிக்கையில் பாதுகாப்புப் படையினரால் சுட்டுக் கொல்லப்பட்டவர்கள் என்பதை மத்திய உள்துறை அமைச்சர் அமித்ஷா நாடாளுமன்றத்தில் உறுதிப்படுத்தினார். பஹல்காம் படுகொலைக்குப் பிறகு ஆபரேஷன் மகாதேவ் எவ்வாறு தொடங்கியது என்பதை ஷா விரிவாகக் கூறினார். மேலும் மூன்று பயங்கரவாதிகளின் அடையாளத்தை உறுதிப்படுத்தவும் அவர்களை வேட்டையாடவும் பல மாதங்கள் கடின உழைப்பு தேவைப்பட்டது என்றார். பயங்கரவாதிகளை ஷா, பாகிஸ்தான் நாட்டை சேர்ந்த ஆப்கான், சுலேமான் என்கிற பைசல் மற்றும் ஜிப்ரான் என்றும் அடையாளம் காட்டினார். பஹல்காமின் கொடூர தாக்குதலுக்கு காரணமானவர்களைக் கண்டுபிடித்து கொல்ல இந்தியப் படைகள் தொழில்நுட்பத்தையும், மனித உளவுத்துறையையும் பயன்படுத்தியது இப்படித்தான்!
விவரங்கள்
இரண்டு தாக்குதலுக்கு காரணமான சுலேமான் தீவிரவாதி
கொல்லப்பட்ட மூவரும் கிரேடு ஏ பயங்கரவாதிகள் என வகைப்படுத்தப்பட்டவர்கள் என்று அமைச்சர் கூறினார். 2024 அக்டோபரில் சோனமார்க் என்ற ரிசார்ட் நகருக்கு அருகிலுள்ள பஹல்காம் தாக்குதல் மற்றும் ககாங்கிர் பயங்கரவாத தாக்குதல் ஆகிய இரண்டிலும் சுலேமான் ஈடுபட்டதாகவும் அவர் கூறினார். பஹல்காம் தாக்குதலுக்கு பின், ஏப்ரல் 22 அன்று இரவில் பாதுகாப்பு கூட்டம் நடத்தப்பட்டது. தொடர்ந்து, ஏப்ரல் 23 அன்று இந்திய ராணுவம், சிஆர்பிஎஃப், பிஎஸ்எஃப் மற்றும் ஜம்மு-காஷ்மீர் காவல்துறை உள்ளிட்ட அனைத்து பாதுகாப்புப் படையினரையும் உள்ளடக்கிய மற்றொரு கூட்டம் நடைபெற்றது. மேலும் பயங்கரவாதிகள் இந்தியாவிலிருந்து தப்பி பாகிஸ்தானுக்கு தப்பிச் செல்ல அனுமதிக்கக் கூடாது என்று முடிவு செய்யப்பட்டது. அவர்கள் தப்பிக்க முடியாதபடி அனைத்து முயற்சிகளும் மேற்கொள்ளப்பட்டதாக உள்துறை அமைச்சர் கூறினார்.
உளவுத்தகவல்
மே மாதம் கிடைத்த உளவுத்தகவல்
மே 22 அன்று, டச்சிகாம் பகுதியில் பயங்கரவாதிகள் இருப்பதாகவும் அவர்களின் நடவடிக்கைகள் குறித்தும் புலனாய்வுப் பிரிவுக்கு (IB) மனித உளவுத் தகவல் கிடைத்தது. "டச்சிகாம் பகுதியில் சிக்னலைப் பிடிக்க, உளவுத்துறை மற்றும் இந்திய ராணுவம் உள்நாட்டில் உருவாக்கப்பட்ட கருவிகளைப் பயன்படுத்தின. அவர்களின் இருப்பை உறுதிப்படுத்த, மே முதல் ஜூலை 22 வரை தொடர்ச்சியான முயற்சிகள் மேற்கொள்ளப்பட்டன". "ராணுவ அதிகாரிகள், உளவுத்துறை அதிகாரிகள் மற்றும் CRPF அதிகாரிகள் இந்த சிக்னல்களை பிடிக்க தீவிர வெப்பநிலையில், கால்நடையாக சிகரங்களில் தேடிக்கொண்டே இருந்தனர்," என்று ஷா தெரிவித்தார்
NIA
3,000 மணி நேரத்திற்கும் மேலாக 1,055 பேரிடம் விசாரணை நடத்திய புலனாய்வுத்துறை
லஷ்கர்-இ-தொய்பா (LeT) மற்றும் அதன் அமைப்பான தி ரெசிஸ்டன்ஸ் ஃப்ரண்ட் (TRF) தாக்குதலுக்குப் பொறுப்பேற்ற நாளிலிருந்து, வழக்கு உடனடியாக NIA-விடம் ஒப்படைக்கப்பட்டது. அவர்கள், பாதிக்கப்பட்டவர்களின் உறவினர்கள், குதிரை வீரர்கள், சுற்றுலாப் பயணிகள், புகைப்படக் கலைஞர்கள் மற்றும் கடைக்காரர்களுடன் நேர்காணல்கள் நடத்தினர். 3,000 மணி நேரத்திற்கும் மேலாக நீடித்த நேர்காணல்களில் மொத்தம் 1,055 பேரிடம் விசாரிக்கப்பட்டு, அனைத்தும் வீடியோவில் பதிவு செய்யப்பட்டதாக அமித்ஷா கூறினார். விசாரணையின் அடிப்படையில், பயங்கரவாதிகளின் ஓவியங்கள் வரையப்பட்டதாகவும், ஜூலை 22 ஆம் தேதி வரை விசாரணை தொடர்ந்ததாகவும், அப்போது பயங்கரவாதிகளின் இருப்பு உறுதி செய்யப்பட்டதாகவும் உள்துறை அமைச்சர் கூறினார்.
கைது
அடைக்கலம் கொடுத்த இரண்டு இந்திய பிரஜைகள் கைது
"விசாரணையின் போது, தாக்குதல்களுக்கு அடுத்த நாள் பயங்கரவாதிகளுக்கு தங்குமிடம் வழங்கிய பஷீர் மற்றும் பர்வேஸ் ஆகியோர் அடையாளம் காணப்பட்டனர்," என்று அவர் மேலும் கூறினார். அவர்கள் இருவரும் தற்போது காவலில் உள்ளனர். கைது செய்யப்பட்ட இரண்டு நபர்களும், ஏப்ரல் 21 ஆம் தேதி இரவு 8 மணியளவில், பைசரன் பள்ளத்தாக்கிலிருந்து சுமார் 2 கி.மீ தொலைவில் உள்ள ஒரு இடத்திற்கு பயங்கரவாதிகள் வந்ததாகவும், அவர்கள் கைகளில் ஏ.கே.-47 மற்றும் எம்9 துப்பாக்கிகளுடன் இருந்ததாகவும் ஏஜென்சிகளிடம் தெரிவித்தனர். பயங்கரவாதிகள், இரவு உணவு மற்றும் தேநீர் அருந்திய பின்னர் வெளியேறும்போது, சிறிது உணவு, உப்பு, மிளகாய் மற்றும் மசாலாப் பொருட்களை எடுத்துச் சென்றனர் எனவும் அவர்கள் கூறினர்.
இருப்பு
சென்சார் மூலம் இருப்பு உறுதியானது
ஜூலை 22 அன்று, பாதுகாப்புப் படையினர் அந்தப் பகுதியை கைமுறையாகச் சோதனை செய்து, சென்சார்கள் மூலம் பயங்கரவாதிகளின் இருப்பை உறுதி செய்தனர். பின்னர், இந்திய ராணுவத்தின் 4 பாரா சிறப்புப் படைகள், CRPF மற்றும் J&K காவல்துறையினருடன் இணைந்து நடத்திய நடவடிக்கையில், பயங்கரவாதிகள் அப்பகுதியில் சுற்றி வளைக்கப்பட்டனர். "ஐந்து மனித உளவாளிகளும் அந்தப் பகுதிக்கு அனுப்பப்பட்டன," என்று ஷா கூறினார், "பின்னர் திங்களன்று, ஆபரேஷன் (மகாதேவ்) மேற்கொள்ளப்பட்டது, அதில் மூன்று பயங்கரவாதிகளும் கொல்லப்பட்டனர்."
அடையாளம்
பயங்கரவாதிகளின் உடல்கள் அடையாளம் காணப்பட்டது
ஆரம்பத்தில், பஹல்காம் தாக்குதலுக்குப் பின்னால் இருந்த மூன்று பயங்கரவாதிகள் இவர்கள்தான் என்ற ஊகம் இருந்தது என்று ஷா அவையில் தெரிவித்தார். எனினும், மூன்று பயங்கரவாதிகளையும் நேரில் பார்த்தவர்கள் இருந்தார்கள். எனவே, மூவரின் உடல்களும் ஸ்ரீநகருக்குக் கொண்டுவரப்பட்டு, பஹல்காமில் தாக்குதல்களை நடத்திய மூன்று பயங்கரவாதிகள் அவர்கள்தான் என்று நான்கு பேர் மூலம் அடையாளம் காணப்பட்டது. கொல்லப்பட்ட மூன்று பயங்கரவாதிகளிடமிருந்து மீட்கப்பட்ட, ஏப்ரல் 22 பஹல்காம் படுகொலையில் பயன்படுத்தப்பட்ட ஒரு எம்-9 மற்றும் இரண்டு ஏகே-47 துப்பாக்கிகள் ஆகிய ஆயுதங்களின் தடயவியல் பரிசோதனை மேற்கொள்ளப்பட்டு உறுதி செய்யப்பட்டது.