தமிழகத்தில் தீபாவளி பட்டாசு வெடிக்க நேரக்கட்டுப்பாடுகள்; மாசுக்கட்டுப்பாட்டு வாரியம் உத்தரவு
செய்தி முன்னோட்டம்
தமிழ்நாடு மாசுக்கட்டுப்பாட்டு வாரியம் தீபாவளி பண்டிகையை முன்னிட்டு பட்டாசு வெடிக்க நேரக்கட்டுப்பாடுகளை அறிவித்துள்ளது.
இந்த ஆண்டு தீபாவளி அக்டோபர் 31ஆம் தேதி கொண்டாடப்பட உள்ள நிலையில், பட்டாசுகளை வெடிக்க சிறப்பு நேரத்தை நிர்ணயித்துள்ளது.
உத்தரவின் படி, தீபாவளி அன்று காலை 6 மணி முதல் 7 மணி வரையும், இரவு 7 மணி முதல் 8 மணி வரையும் மட்டுமே பட்டாசுகளை வெடிக்க அனுமதிக்கப்படும்.
பொதுமக்கள் குறைந்த ஒலியுடன் மற்றும் குறைந்த அளவு காற்று மாசுபடுத்தும் பசுமை பட்டாசுகளை பயன்படுத்த வேண்டும் என அறிவுறுத்தப்பட்டுள்ளது.
பொது இடங்கள்
அனுமதிக்கப்பட்ட இடங்களில் மட்டுமே பட்டாசு வெடிக்க அனுமதி
மேலும், மாவட்ட நிர்வாகம் மற்றும் உள்ளாட்சி அமைப்புகளின் அனுமதியுடன், பொதுமக்கள் திறந்த வெளியில் ஒன்று கூடி, நலச்சங்கங்கள் ஏற்பாடு செய்யும் இடங்களில் மட்டுமே கூட்டாக பட்டாசுகளை வெடிக்கலாம்.
அதிக ஒலி எழுப்பும் சரவெடிகளைத் தவிர்க்க வேண்டும் என்றும், மருத்துவமனைகள், வழிபாட்டு தலங்கள் மற்றும் அமைதி காக்கப்படும் இடங்களில் பட்டாசு வெடிக்கக் கூடாது என அறிவுறுத்தப்பட்டுள்ளது.
குடிசை பகுதிகள் மற்றும் எளிதில் தீப்பற்றக்கூடிய இடங்களுக்கு அருகில் பட்டாசுகளை வெடிக்கத் தடை விதிக்கப்பட்டுள்ளது.
மாசுக்கட்டுப்பாட்டு வாரியம் வெளியிட்ட இந்த அறிவுறுத்தல்களை பொதுமக்கள் கட்டாயமாகப் பின்பற்ற வேண்டும் என வலியுறுத்தப்பட்டுள்ளது.