சென்னையில் தொடர் போராட்டம் நடத்திவந்த ஆசிரியர்கள் கைது
செய்தி முன்னோட்டம்
சென்னை நுங்கம்பாக்கத்திலுள்ள பள்ளி கல்வித்துறை வளாகத்தில், சம வேலைக்கு சம ஊதியம் வழங்கக்கோரி, இடைநிலை ஆசிரியர்கள், பணி நிரந்தரம் செய்யக்கோரி பகுதிநேர சிறப்பு ஆசிரியர்கள், புதிய பணி நியமனத்திற்கான தேர்வினை நடத்தக்கூடாது என்று டெட் தேர்வில் தேர்ச்சிப்பெற்ற ஆசிரியர்கள் என மொத்தம் 3 வகையான ஆசிரியர் சங்கங்கள் போராட்டம் செய்து வருகின்றனர்.
இவர்களுடன் உயரதிகாரிகள், அமைச்சர்கள் ஆகியோர் பேச்சுவார்த்தை நடத்திய நிலையில் அதுவும் தோல்வியுற்றது.
இதனைத்தொடர்ந்து பள்ளி கல்வித்துறை அமைச்சர் அன்பில் மகேஷ், முதல்வருடன் இதுகுறித்து ஆலோசனை நடத்தினார்.
அதன்பின்னர் அவர், டெட் தேர்வில் தேர்ச்சிப்பெற்ற ஆசிரியர்களின் உச்ச வயதுவரம்பு பொதுப்பிரிவினருக்கு 53ஆகவும், இதர பிரிவினருக்கு 58ஆகவும் உயர்த்தப்படும் என்று கூறினார்.
தொடர்ந்து, பகுதிநேர ஆசிரியர்களின் ஊதியம் ரூ.10,000லிருந்து ரூ.12,500ஆக உயர்த்துவதாகவும் கூறினார்.
கைது
7 நாட்களுக்கு மேல் போராட்டம் நடத்த அனுமதியில்லை - காவல்துறை
மேலும் அவர், இடைநிலை ஆசிரியர்கள் முன்வைத்துள்ள கோரிக்கை குறித்து தொடக்கக்கல்வி இயக்குனர், நிதித்துறை செயலாளர்,பள்ளிக்கல்வித்துறை செயலாளர் உள்ளிட்ட 3 பேர் கொண்ட குழு 3 மாதங்களில் கொடுக்கும் அறிக்கையின் அடிப்படையில் நடவடிக்கை எடுக்கப்படும் என்று அறிவித்தார்.
ஆனால் இந்த அறிவிப்புகள் திருப்திகரமாக இல்லை என்று ஏற்க மறுத்த ஆசிரியர்கள் சங்கங்கள், தங்கள் கோரிக்கைகள் முழுமையாக நிறைவேற்றப்படும் வரையில் தொடர் போராட்டத்தில் ஈடுபடப்போவதாகவும் தெரிவித்தனர்.
இதனிடையே, 7 நாட்களுக்கு மட்டுமே போராட்டம் நடத்த அனுமதியளிக்கப்பட்ட நிலையில், போராட்டத்தினை இதற்கு மேல் தொடர அனுமதிக்க முடியாது என்று காவல்துறை சார்பில் கூறப்பட்டது.
அதன்படி, இன்று(அக்.,5)டிபிஐ வளாகத்தில் போராட்டத்தில் ஈடுபட்டிருந்த ஆசிரியர்களை கைது செய்த காவல்துறை, ஆயிரம்விளக்கு பகுதிகளிலுள்ள சமுதாய நலக்கூடங்களில் அடைக்கப்பட்டுள்ளனர் என்று கூறப்படுகிறது.