நகர்ப்புற உள்ளாட்சி பகுதிகளில் சாலை, குடிநீர், பள்ளி உள்கட்டமைப்பு பணிகளுக்கு ₹1,019.61 கோடி ஒதுக்கீடு: தமிழ்நாடு அரசு அறிவிப்பு
செய்தி முன்னோட்டம்
தமிழகத்தில் உள்ள நகர்ப்புற உள்ளாட்சி பகுதிகளில் அடிப்படை உட்கட்டமைப்பு வசதிகளை மேம்படுத்த தமிழ்நாடு அரசு முக்கிய நடவடிக்கை எடுத்துள்ளது. பொதுமக்களுக்கு பாதுகாப்பான மற்றும் சுகாதாரமான வாழ்விட சூழலை உருவாக்கும் நோக்கில் ஜூன் 2026 முதல் பல்வேறு வளர்ச்சிப் பணிகளுக்கு அனுமதி வழங்கப்பட்டுள்ளது. இதன்படி நகராட்சி நிர்வாக இயக்குநரகத்தின் கீழ் மொத்தம் ₹1,019.61 கோடி மதிப்பீட்டிலான பணிகள் மேற்கொள்ளப்படுகின்றன. சாலை வசதிகள், குடிநீர் விநியோகம், பள்ளிக் கட்டடங்கள் மற்றும் திடக்கழிவு மேலாண்மை உள்ளிட்ட பணிகளுக்கு இந்த நிதி ஒதுக்கீடு செய்யப்பட்டுள்ளது.
குடிநீர் விநியோகத் திட்டங்கள்
சாலைகள் மேம்பாட்டிற்கு ₹366.23 கோடியும் குடிநீர் விநியோகத் திட்டங்களுக்கு ₹216.36 கோடியும் ஒதுக்கீடு
போக்குவரத்து வசதிகளை மேம்படுத்த 599.79 கிலோமீட்டர் நீளத்திலான 3,765 சாலைப் பணிகளுக்கு ₹366.23 கோடி நிதி ஒதுக்கப்பட்டுள்ளது.
மேலும் மதுரை, கடலூர் மாநகராட்சிகள் மற்றும் கம்பம், சிதம்பரம் நகராட்சிகளில் குடிநீர் திட்டங்களுக்காக ₹119.00 கோடி மதிப்பீட்டில் அனுமதி அளிக்கப்பட்டுள்ளது.
இதுதவிர தென்மேற்குப் பருவமழை குறைவால் ஏற்பட்ட குடிநீர் பற்றாக்குறையைப் போக்க மாநில பேரிடர் நிவாரண நிதியிலிருந்து ₹97.36 கோடி ஒதுக்கப்பட்டுள்ளது.
இதன் மூலம் குடிநீர் தட்டுப்பாடு ஏற்பட்ட நகராட்சிகள் மற்றும் மாநகராட்சிகளில் 457 பணிகள் நடைபெற்று வருகின்றன.
பள்ளிகள்
பள்ளி வகுப்பறைகள், அங்கன்வாடி மையங்கள் மற்றும் பூங்காக்கள் மேம்பாட்டுப் பணிகள் தீவிரம்
மாணவர்களின் கல்வித் தரத்தை உயர்த்த 106 புதிய பள்ளி வகுப்பறைகள் கட்ட ₹71.40 கோடி ஒதுக்கீடு செய்யப்பட்டுள்ளது.
மேலும் 78 பள்ளி வகுப்பறைகளைப் பழுதுபார்க்க ₹13.83 கோடியும், 123 புதிய அங்கன்வாடி கட்டடங்கள் கட்ட ₹29.68 கோடியும் வழங்கப்பட்டுள்ளது.
ஒன்பது அங்கன்வாடி மையங்களின் பராமரிப்புப் பணிகளுக்காக ₹0.38 கோடி மதிப்பீட்டில் நிதி அனுமதிக்கப்பட்டுள்ளது.
அத்துடன் சுற்றுச்சூழல் பாதுகாப்பை மேம்படுத்தும் நோக்கில் 87 பூங்காக்களை சீரமைக்க ₹14.87 கோடி ஒதுக்கப்பட்டுள்ளது.
திடக்கழிவு மேலாண்மை
விளையாட்டு அரங்கங்கள் மற்றும் திடக்கழிவு மேலாண்மை பணிகளுக்கு ₹306.86 கோடி நிதி
இளைஞர்களின் உடல் மற்றும் மனநலத்தை ஊக்குவிக்க 78 விளையாட்டு உட்கட்டமைப்புப் பணிகளுக்கு ₹13.14 கோடி ஒதுக்கப்பட்டுள்ளது.
மேலும் ₹14.35 கோடி மதிப்பீட்டில் இரண்டு புதிய விளையாட்டு அரங்கங்கள் அமைக்கவும் அரசு அனுமதி வழங்கியுள்ளது.
தூய்மை இந்தியா இயக்கம் 2.0 மற்றும் பொது நிதியின் கீழ் திடக்கழிவு மற்றும் கழிவுநீர் மேலாண்மைக்கு ₹279.37 கோடி ஒதுக்கப்பட்டுள்ளது.
குப்பைக் கிடங்குகளில் பயோமைனிங், உயிரி எரிவாயு ஆலைகள் மற்றும் கழிவுநீர் சுத்திகரிப்பு நிலையங்கள் உள்ளிட்ட 48 பணிகள் இதன் மூலம் செயல்படுத்தப்படுகின்றன.