'இந்து மதம் உலகத்திற்கே மிகப்பெரும் அச்சுறுத்தலாக இருக்கிறது': ஆ.ராசாவின் வீடியோவை வெளியிட்டார் பாஜக தலைவர் அண்ணாமலை
திமுக எம்பி ஆ. ராசா இந்து மதம் குறித்து பேசும் ஒரு வீடியோவை தமிழக பாஜக தலைவர் அண்ணாமலை ட்விட்டரில் வெளியிட்டுள்ளார். ஏற்கனவே, திமுக அமைச்சர் உதயநிதி ஸ்டாலின் சனாதனம் குறித்து பேசியது பெரும் சர்ச்சையை கிளப்பியுள்ள நிலையில் இந்த வீடியோ வெளியிடப்பட்டுள்ளது. அந்த வீடியோவில் திமுக எம்பி ஆ. ராசா, "உலக அளவில் சாதி என்ற நோய் பரவுவதற்கு இந்து மதம் தான் காரணம். சாதி ரீதியாக மக்களை பிரிக்கிறது இந்து மதம்... பிற நாடுகளில் வாழும் இந்தியர்களும் இந்து மதம் என்ற பெயரால் சாதியை பரப்புகிறார்கள். எனவே, இந்தியாவுக்கு மட்டுமல்ல, இந்து மதம் தற்போது மொத்த உலகத்திற்கும் மிகப்பெரிய அச்சுறுத்தலாக மாறிவிட்டது." என்று கூறியுள்ளார்.
சனாதன தர்மத்தை தொழுநோயுடன் ஒப்பிட்டு பேசிய ஆ ராசா
இந்த வீடியோவை ட்விட்டரில் வெளியிட்டிருக்கும் பாஜக தலைவர் அண்ணாமலை , "இந்து மதம் இந்தியாவுக்கும் உலகத்துக்கும் ஆபத்து என்று திமுக எம்பி ஆ ராசா கூறியுள்ளார். தமிழகத்தில் சாதி பிளவு மற்றும் வெறுப்புணர்வை உருவாக்க திமுக தான் முக்கிய காரணம். அவர்கள் செய்த குளறுபடிக்கு சனாதன தர்மத்தை குறை சொல்லும் துணிச்சல் திமுக எம்பிக்கு உள்ளது." என்று குறிப்பிட்டுள்ளார். சனாதன தர்மத்தை தொழுநோயுடன் ஒப்பிட்டு பேசியதால் ஏற்கனவே ஆ ராசாவை பலரும் விமர்சித்து வருகின்றனர். "சனாதனம் சமூகக் களங்கம் கொண்ட எச்.ஐ.வி மற்றும் தொழுநோயைப் போலவே கருதப்பட வேண்டும்." என்று ஆ.ராசா கடந்த புதன்கிழமை நடைபெற்ற ஒரு பொது நிகழ்ச்சியில் பேசியிருந்தார். இந்நிலையில், இந்த புதிய வீடியோவை பாஜக தலைவர் அண்ணாமலை வெளியிட்டுள்ளார்.
இந்த காலவரிசையைப் பகிரவும்