T20 உலகக்கோப்பை 2026: இங்கிலாந்திடம் பாகிஸ்தான் அதிர்ச்சித் தோல்வி, அரையிறுதிக்கு செல்ல வாய்ப்பு இருக்கிறதா?
செய்தி முன்னோட்டம்
நேற்று நடைபெற்ற விறுவிறுப்பான சூப்பர் 8 சுற்று ஆட்டத்தில், இங்கிலாந்திடம் 2 விக்கெட்டுகள் வித்தியாசத்தில் பாகிஸ்தான் தோல்வியடைந்தது. இதன் மூலம் 2 போட்டிகளில் விளையாடி வெறும் 1 புள்ளியுடன் இருக்கும் பாகிஸ்தான், தொடரிலிருந்து வெளியேறும் அபாயத்தில் உள்ளது. அதேவேளையில், இங்கிலாந்து அணி அதிகாரப்பூர்வமாக அரையிறுதிக்கு தகுதி பெற்றுவிட்டது. முதலில் பேட்டிங் செய்த பாகிஸ்தான், சாஹிப்சாதா ஃபர்ஹானின் நிதானமான ஆட்டத்தால் 20 ஓவர்களில் 164 ரன்கள் எடுத்தது. தொடர்ந்து ஆடிய இங்கிலாந்து கேப்டன் ஹாரி புரூக் அபாரமாக விளையாடி 51 பந்துகளில் சதம் விளாசி சாதனை படைத்தார். ஷாஹீன் அப்ரிடி 4 விக்கெட்டுகளை வீழ்த்தி நெருக்கடி கொடுத்தபோதிலும், கடைசி ஓவரின் முதல் பந்தில் ஜோப்ரா ஆர்ச்சர் பவுண்டரி அடித்து இங்கிலாந்தை வெற்றி பெறச் செய்தார்.
அரையிறுதி
பாகிஸ்தான் அரையிறுதிக்கு தகுதி பெறுவது எப்படி?
பாகிஸ்தானின் விதி இப்போது மற்ற அணிகளின் கைகளில் உள்ளது. இதோ அந்த இரண்டு வாய்ப்புகள்: வாய்ப்பு 1: தனது கடைசிப் போட்டியில் பாகிஸ்தான் இலங்கையை வீழ்த்த வேண்டும். அதேசமயம், நியூசிலாந்து அணி தனது எஞ்சியுள்ள இரண்டு போட்டிகளிலும் (இலங்கை மற்றும் இங்கிலாந்திடம்) தோல்வியடைய வேண்டும். அப்படி நடந்தால் பாகிஸ்தான் 3 புள்ளிகளுடன் அரையிறுதிக்குச் செல்லும். வாய்ப்பு 2: நியூசிலாந்து தனது 2 போட்டிகளில் ஒன்றில் மட்டும் வென்று 3 புள்ளிகள் பெற்றால், பாகிஸ்தான் தனது கடைசிப் போட்டியில் இலங்கையை மிகப்பெரிய ரன் வித்தியாசத்தில் வீழ்த்த வேண்டும். அப்போது 'நெட் ரன் ரேட்' அடிப்படையில் பாகிஸ்தான் முன்னேற முடியும். பாகிஸ்தான் தனது கடைசிப் போட்டியை பிப்ரவரி 28-ஆம் தேதி விளையாடுகிறது.