அருந்ததியர் இன மக்கள் குறித்து அவதூறாக பேசிய வழக்கு - சீமானுக்கு சம்மன்
ஈரோடு கிழக்கு இடைத்தேர்தல் நடந்த பொழுது பொதுக்கூட்டத்தில் பேசிய நாம் தமிழர் கட்சி தலைமை ஒருங்கிணைப்பாளரான சீமான் அருந்ததியர் இன மக்கள் குறித்து அவதூறாக கருத்துக்களை தெரிவித்தார் என்று கூறப்பட்டதோடு அவர் மீது அவதூறு வழக்கும் தொடரப்பட்டது. அவர் அருந்ததியர் இன மக்கள் குறித்து பேசியதாவது, ஈரோடு கிழக்கு தொகுதியில் பெரும்பான்மையாக முதலியார் சமுதாயத்தினை சேர்ந்தோரே வசித்து வருகிறார்கள். அருந்ததியர் சமுதாயத்தினை சேர்ந்தோர் வெறும் 6% தான். இவர்கள் தமிழ்நாட்டினை சேர்ந்தவர்கள் அல்ல. தெலுங்கு மொழி பேசும் இவர்கள், விஜயநகர பேரரசு நடத்திய ஆட்சியின்போது தூய்மை பணி செய்ய இந்த வந்தவர்கள் என்று கூறியிருந்தார்.
சம்மனை சீமானிடம் நேரடியாக கொடுத்த கருங்கல்பாளையம் காவல்துறை
ஒரு பொதுக்கூட்டத்தில் சீமான் இவ்வாறு பேசியதற்கு பெரும் எதிர்ப்புகள் எழுந்த நிலையில் அவர் மீது காவல்துறை எஸ்.சி., மற்றும் எஸ்.டி.,வன்கொடுமை தடுப்பு சட்டத்தின் கீழ் வழக்குப்பதிவு செய்தது. இந்நிலையில் தற்போது சீமான் இந்த வழக்கு குறித்த விசாரணைக்கு வரும் 9ம் தேதி நீதிமன்றத்தில் ஆஜராகுமாறு கருங்கல்பாளையம் காவல்துறை சம்மன் அளித்துள்ளது என்று தகவல்கள் வெளியாகியுள்ளது. இந்த சம்மனை திருப்பூர் மாவட்டத்தில் வைத்து கருங்கல்பாளையம் காவல்துறையினர் சீமானிடம் வழங்கியதாகவும் கூறப்படுகிறது. ஏற்கனவே, சீமான் தன்னை திருமணம் செய்து கொள்வதாக கூறி ஏமாற்றிவிட்டதாக நடிகை விஜயலட்சமி தொடர்ந்து அவர் மீது குற்றச்சாட்டுகளை அடுக்கி சென்னை வளசரவாக்கத்தில் புகார் அளித்துள்ளார். இந்நிலையில், இந்த சம்மன் சீமானுக்கு மேலும் அதிகளவு நெருக்கடியினை ஏற்படுத்தியுள்ளது என்பது குறிப்பிடத்தக்கது.
இந்த காலவரிசையைப் பகிரவும்