ரஷ்யாவில் தரையிறக்கப்பட்ட ஏர் இந்தியா விமானம்: நிவாரணத்தை அனுப்புகிறது இந்திய அரசாங்கம்
செய்தி முன்னோட்டம்
ரஷ்யாவில் சிக்கி தவிக்கும் இந்திய பயணிகளை வெளியேற்ற இருந்த மாற்று விமானம் இன்று(ஜூன் 7) தாமதமானது.
ஏர் இந்தியா அதிகாரிகள் விமானத்தை இயக்குவதற்கான ஒழுங்குமுறை சிக்கல்களில் ஈடுபட்டுள்ளதால் இந்த மாற்று விமானம் தாமதமானதாக கூறப்படுகிறது.
புது டெல்லியில் இருந்து சான்பிரான்சிஸ்கோவிற்கு கிளம்பிய ஏர் இந்தியா விமானம்(ஏஐ173), இன்ஜின் கோளாறு காரணமாக,நேற்று ரஷ்யாவின் மகதான் விமான நிலையத்தில் அவசரமாக தரையிறக்கப்பட்டது.
ரஷ்யாவின் தலைநகர் மாஸ்கோவில் இருந்து 10,000 கிமீ தொலைவில் உள்ள மகதானில் சிக்கித் தவிக்கும் ஏர் இந்தியா பயணிகள் தற்போது ஒரு பள்ளியில் தங்க வைக்கப்பட்டுள்ளனர்.மகதானில் சிக்கித் தவிக்கும் பயணிகளின் நிலையை உன்னிப்பாக கவனித்து வருவதாக சிவில் விமானப் போக்குவரத்து அமைச்சகம் கூறியுள்ளது.
details
விமானத்தில் எத்தனை அமெரிக்க குடிமக்கள் இருந்தனர் என்பது தெரியவில்லை: அமெரிக்கா
ரஷ்யாவில் சிக்கித் தவிக்கும் பயணிகளை மகதானில் இருந்து சான் பிரான்சிஸ்கோவிற்கு அழைத்துச் செல்ல மும்பையில் இருந்து இன்று மதியம் 1 மணிக்கு நிவாரண விமானம் புறப்படும் என்றும் சிவில் விமானப் போக்குவரத்து அமைச்சகம் தெரிவித்துள்ளது.
"அமெரிக்கா செல்லும் விமானம் ரஷ்யாவில் அவசரமாக தரையிறங்க வேண்டியிருந்தது என்பதை நாங்கள் அறிவோம். மேலும் நிலைமையை உன்னிப்பாகக் கண்காணித்து வருகிறோம். இந்த நேரத்தில் விமானத்தில் எத்தனை அமெரிக்க குடிமக்கள் இருந்தனர் என்பதை என்னால் உறுதிப்படுத்த முடியவில்லை" என்று அமெரிக்க அரசு துறை துணை செய்தி தொடர்பாளர் வேதாந்த் படேல் தெரிவித்துள்ளார்.
அமெரிக்கா மற்றும் ரஷ்யா எதிரி நாடுகள் என்பதால் இதன் நிலைமையை உன்னிப்பாகக் கண்காணித்து வருவதாக அமெரிக்கா நேற்று தெரிவித்தது.