சண்டிகர் மேயர் தேர்தல் வாக்குகளை மீண்டும் எண்ணுவதற்கு உச்ச நீதிமன்றம் உத்தரவு
சண்டிகர் மேயர் தேர்தல் தொடர்பான சர்ச்சை குறித்து இன்று விசாரித்த உச்ச நீதிமன்றம், தேர்தல் அதிகாரி அனில் மாசிஹ்க்கு கடும் கண்டனம் தெரிவித்துள்ளது. சண்டிகர் மேயர் தேர்தலின் போது எழுந்த குற்றசாட்டுகளை தலைமை நீதிபதி டி.ஒய்.சந்திரசூட் தலைமையிலான அமர்வு, இன்று விசாரித்தது. சமீபத்தில் நடந்த சண்டிகர் மேயர் தேர்தலில் பாஜக வேட்பாளர் மனோஜ்குமார் சோங்கர் வெற்றி பெற்றார். எதிர்க்கட்சி கூட்டணி வேட்பாளரின் 8 வாக்குகள் செல்லாது என அறிவிக்கப்பட்டதை அடுத்து, ஆம் ஆத்மி-காங்கிரஸ் கூட்டணி வேட்பாளர் குல்தீப் சிங் தோற்கடிக்கப்பட்டார். 8 வாக்குகள் செல்லாது என அறிவிக்கப்பட்டதற்கு எதிராக பஞ்சாப்-ஹரியானா உயர்நீதிமன்றத்தை ஆம் ஆத்மி அணுகியது.
எட்டு "செல்லாத" வாக்குகளை ஆய்வு செய்ய உத்தரவு
ஓய்வுபெற்ற நீதிபதியின் மேற்பார்வையின் கீழ் புதிய தேர்தலை நடத்த வேண்டும் என்று கோரி பஞ்சாப் மற்றும் ஹரியானா உயர்நீதிமன்றத்தில் ஆம் ஆத்மி கவுன்சிலர் குல்தீப் குமார் மனு தாக்கல் செய்தார். ஆனால், அவருக்கு இடைக்கால நிவாரணம் வழங்க பஞ்சாப்-ஹரியானா உயர்நீதிமன்றம் மறுத்துவிட்டது. அதன்பிறகு, அவர் இது குறித்து உச்ச நீதிமன்றத்தில் மேல் முறையீடு செய்தார். இன்று இந்த பிரச்சனையை விசாரித்த உச்ச நீதிமன்றம், எட்டு "செல்லாத" வாக்குகளை ஆய்வு செய்து, அது உண்மையிலேயே செல்லுபடியாகுமா அல்லது செல்லுபடியாகாதா என்பது அறிவிக்கப்படும் என்று தெரிவித்துள்ளது. குறிப்பிடப்படாத காரணங்களுக்காக தேர்தல் அதிகாரி நிராகரித்த 8 வாக்குகளையும் சேர்த்து எண்ணினால் காங்கிரஸ்-ஆம் ஆத்மி கூட்டணி சண்டிகர் மேயர் தேர்தலில் வெற்றி பெறும் என்பது குறிப்பிடத்தக்கது.
