தமிழகத்தினை வெளுக்க வருகிறது மோக்கா புயல் - வானிலை அறிக்கை
செய்தி முன்னோட்டம்
தமிழ்நாடு மாநிலத்தில் கடந்தசில தினங்களாக கோடை மழை பொழிந்து வெயிலின் தாக்கத்தினை சற்று குறைத்துள்ளது.
இதனிடையே தென்கிழக்கு வங்கக்கடலில் வரும் 6ம்தேதி(நாளை)காற்று சுழற்சி உருவாகும் என்று வானிலை அறிக்கை முன்னதாக தெரிவித்திருந்தது.
இந்நிலையில் தற்போது அந்த காற்று சுழற்சியானது வலுப்பெற்று நாளை மறுநாள்(மே.,7)காற்றழுத்த தாழ்வுப்பகுதியாக மாறக்கூடும் என்று வானிலை மையத்தின் அறிக்கை வெளியாகியுள்ளது.
அதன்படி இந்த காற்றழுத்த தாழ்வுப்பகுதியானது வடக்கு திசையில் நகர்ந்து மத்திய வங்கக்கடலில் புயலாக வலுப்பெறும் என்றும் கூறப்பட்டுள்ளது.
இந்தாண்டின் முதல் புயலாக உருவாகும் இதற்கு 'மோக்கா'புயல் என பெயரிடப்பட்டுள்ளது.
இதுகுறித்து சென்னை வானிலைமைய இயக்குனர் செந்தாமரை கண்ணன் கூறுகையில், தென்கிழக்கு வங்கக்கடலில் வளிமண்டலக்கீழடுக்கு சுழற்சி நாளை உருவாகிறது.
நாளை மறுநாள் புயலாக மாறும் பட்சத்தில் இதன் நகர்வுகள் கண்காணிக்கப்படும்.
வானிலை அறிக்கை
மீனவர்கள் கடலுக்கு செல்ல வேண்டாம்
மேலும் அவர் கூறுகையில், தமிழகம் மற்றும் புதுச்சேரியில் இன்று முதல் நாளை மறுதினம் வரை மிதமான மழை பெய்யும்.
சென்னையில் ஒரு சில இடங்களில் லேசான மழைக்கு வாய்ப்புள்ளது.
அதிகபட்ச வெப்பநிலையானது 4 டிகிரி செல்ஷியஸ் வரை உயரக்கூடும்.
சென்னையில் அதிகபட்சமாக 35 டிகிரி செல்ஷியஸ் வரை வெப்பநிலை பதிவாகும்.
தென்கிழக்கு வங்கக்கடல் பகுதிகளில் 7 மற்றும் 8ம் தேதிகளில் 60 முதல் 70 கி.மீ., வேகத்தில் சூறாவளி காற்று வீசும்,
அதே போல் 10ம் தேதி மணிக்கு 80கி.மீ., வேகத்தில் சூறாவளி காற்று வீசும். இதனால் மேற்கூறப்பட்ட தேதிகளில் மீனவர்கள் கடலுக்கு செல்ல வேண்டாம் என்று எச்சரிக்கை விடுத்துள்ளார் என்பது குறிப்பிடத்தக்கது.