டெல்லியில், ₹350க்காக 18 வயது வாலிபர், சிறுவனால் 60 முறை குத்திக்கொலை
வடகிழக்கு டெல்லியின் வெல்கம் ஏரியா பகுதியில், 18 வயது வாலிபரை, கத்தியால் குத்தி கொலை செய்த 16 வயது சிறுவன், அந்த உடலின் அருகில் நடனம் ஆடும் கொடூரமான காட்சிகள் சிசிடிவி கேமராவில் பதிவாகியுள்ளது. வாலிபரிடம் ₹350 திருடுவதற்காக சிறுவன் இக்கொலையில் ஈடுபட்டதாக கூறப்படுகிறது. கொலை செய்த பின், வாலிபரின் உடலை இருபுறமும் வீடுகள் சூழ்ந்த குறுகிய பாதையில் அச்சிறுவன் இழுத்துச் செல்வது, அங்கு பொருத்தப்பட்டிருந்த சிசிடிவியில் தெரிகிறது. பின்னர், சிறுவன் இரக்கமின்றி வாலிபரின் காதுகள், முகம், அவரது கழுத்தை வெட்டினார். மேலும், அந்த சிறுவன் தொடர்ந்து இந்த வாலிபரை 60 முறை குத்துவதும், உடலின் அருகில் நடனம் ஆடும் காட்சிகளும் சிசிடிவி கேமராவில் சிக்கியுள்ளது.
சிறுவனை 'வயது வந்தவராக' விசாரிக்க காவல்துறையினர் திட்டம்
காவல்துறை அளித்துள்ள தகவலின் படி, முதலில் அந்த சிறுவன் இந்த வாலிபரைக் கழுத்தை நெரித்து கொலை செய்துவிட்டு பின்னர், குறுகலான பகுதிக்கு இழுத்துச் சென்று பலமுறை குத்திய பின்னர், ₹350 திருடியதாக தெரிவித்தனர். இந்தியா டுடேவிடம் பேசிய வடகிழக்கு டெல்லியின் துணை போலீஸ் கமிஷனர்(டிசிபி), இந்த வழக்கில் குற்றம் சாட்டப்பட்டவரை 'வயது வந்தவராக' விசாரிக்க நீதிமன்றத்தில் போலீசார் விண்ணப்பம் செய்வார்கள் என்று கூறினார். "ஒரு சாதாரண திருடன் பணத்தை கொள்ளையடித்துவிட்டு சென்றுவிடுவான். ஆனால் இந்த விஷயத்தில் அவன் மனதில் என்ன தோன்றியது என்று தெரியவில்லை. வாலிபரை பலமுறை கத்தியால் குத்தி இருக்கிறான்" என அந்த அதிகாரி தெரிவித்தார்.
பல வழக்குகளில் தொடர்புடைய சிறுவன்
இந்தச் சிறுவன், கடந்த ஆண்டு திருடும் நோக்கோடு ஒருவரை கொலை செய்த குற்றத்தில் சம்பந்தப்பட்டிருப்பதாக காவல்துறையினர் தெரிவிக்கின்றனர். மேலும், இதற்கு முன்பு நடந்த சண்டை மற்றும் கொலை வழக்குகளில், இந்த சிறுவனுக்கு தொடர்புள்ளது குறிப்பிடத்தக்கது. "நாங்கள், சிறார்கள் குறித்த பதிவுகளை வைத்திருப்பதில்லை, ஆனால் கடந்த காலங்களில், குற்றம் சாட்டப்பட்ட சிறுவன் கொலை மற்றும் சண்டை வழக்குகளில் ஈடுபட்டுள்ளார்" என வடகிழக்கு டெல்லி டிசிபி, இந்தியா டுடேவிடம் தெரிவித்தார்.
