ஜார்கண்ட் மாநிலத்தில் ரயில் தண்டவாளத்தை தகர்த்த மாவோயிஸ்டுகள்
செய்தி முன்னோட்டம்
ஜார்க்கண்டின் மேற்கு சிங்பூம் மாவட்டத்தில், தடைசெய்யப்பட்ட சிபிஐ (மாவோயிஸ்ட்) உறுப்பினர்கள் ரயில் தண்டவாளத்தின் ஒரு பகுதியை குண்டு வைத்து தகர்த்ததால், ஹவுரா-மும்பை வழித்தடத்தில் பல மணி நேரம் ரயில் சேவைகள் பாதிக்கப்பட்டன.
மாநிலத்தின் தலைநகர் ராஞ்சியில் இருந்து சுமார் 150 கி.மீ தொலைவிலுள்ள, மகாதேவ்சல் மற்றும் போசோய்டா ரயில் நிலையங்களுக்கிடையே, நேற்று நள்ளிரவில் இச்சம்பவம் நடைபெற்றதாக காவல்துறையினர் தெரிவித்துள்ளனர்.
மாவோயிஸ்டுகள் அப்பகுதியில் பதாகைகள் மற்றும் சுவரொட்டிகளை ஒட்டியதாக தெரிவித்த, மேற்கு சிங்பூம் காவல்துறை கண்காணிப்பாளர் அசுதோஷ் சேகர், அப்பகுதியில் பாதுகாப்பு அதிகரிக்கப்பட்டுள்ளதாகவும் விவரித்தார்.
2nd card
வேலை நிறுத்தத்திற்கு அழைப்பு விடுத்த மாவோயிஸ்டுகள்
ரயில் தண்டவாளத்தை சரி செய்யும் பணிகள் இன்று அதிகாலையில் தொடங்கப்பட்ட நிலையில், காலை 8:15 மணிக்கு ரயில் போக்குவரத்து தொடங்கப்பட்டதாக, தென்கிழக்கு ரயில்வேயின் சக்ரதர்பூர் கோட்ட உதவி வணிக மேலாளர் வினித் குமார் பிடிஐ இடம் தெரிவித்தார்.
"மகாதேவ்சல் மற்றும் போசோய்டா ரயில் நிலையங்களுக்கு இடையே தண்டவாளம் தகர்க்கப்பட்டது குறித்து, நேற்று இரவு 11.47 தகவல் கிடைத்தது.
அடையாளம் தெரியாத நபர்கள் குண்டு வைத்து தகர்த்ததால், இரண்டு முதல் மூன்று மீட்டர் நீளத்திற்கு தண்டவாளங்கள் பழுதடைந்தன" என குமார் கூறினார்.
குறிப்பிடத்தக்க வகையில் சம்பவத்தில் ஈடுபட்ட அமைப்பு, டிசம்பர் 16 முதல் போராட்ட வாரத்தை அறிவித்திருந்த நிலையில், இன்று நாடு தழுவிய வேலை நிறுத்தத்திற்கு அழைப்பு விடுத்திருந்தது.