குணால் கம்ராவின் முன்ஜாமீனை ஏப்ரல் 17 வரை நீட்டித்து சென்னை உயர் நீதிமன்றம் உத்தரவு
செய்தி முன்னோட்டம்
மும்பையில் பதிவு செய்யப்பட்ட பல எஃப்ஐஆர்கள் தொடர்பாக கைது செய்யப்படுவதிலிருந்து தொடர்ந்து பாதுகாப்பை வழங்கும் வகையில், ஸ்டாண்ட்-அப் காமெடியன் குணால் கம்ராவுக்கு ஏப்ரல் 17 ஆம் தேதி வரை இடைக்கால முன்ஜாமீனை சென்னை உயர் நீதிமன்றம் திங்கட்கிழமை (ஏப்ரல் 7) நீட்டித்துள்ளது. முன்னதாக, பிப்ரவரி 2025 அன்று மகாராஷ்டிராவில் நடந்த நகைச்சுவை சிறப்பு நிகழ்ச்சியான நயா பாரத் நிகழ்ச்சியில் கம்ரா அம்மாநில துணை முதல்வர் ஏக்நாத் ஷிண்டே குறித்து சர்ச்சைக்குரிய வகையில் கருத்து கூறியதாக கூறப்படும் சம்பவத்தைத் தொடர்ந்து அவர் மீது பல்வேறு வழக்குகள் பதியப்பட்டன. இதையடுத்து குணால் கம்ரா தரப்பில் சென்னை உயர் நீதிமன்றத்தில் முன்ஜாமீன் மனு தாக்கல் செய்யப்பட்டது.
சென்னை
சென்னையில் முன்ஜாமீன் மனு ஏன்?
குணால் கம்ரா 2021 முதல் தமிழ்நாட்டின் விழுப்புரத்தில் வசிக்கிறார் என்றும், சட்ட உதவிக்காக மும்பைக்குச் சென்றால் உடனடியாக கைது செய்யப்படுவார் என்ற கவலைகள் இருப்பதாகவும் கூறி, சென்னை உயர் நீதிமன்றத்தில் போக்குவரத்து முன்ஜாமீன் கோரியிருந்தார். மார்ச் 28 அன்று ஏப்ரல் 7 வரை இடைக்கால நிவாரணம் வழங்கிய நீதிபதி சுந்தர் மோகன், குணால் கம்ரா மகாராஷ்டிராவில் உள்ள பொருத்தமான நீதிமன்றத்தை அணுகுமாறு அறிவுறுத்தினார். இந்நிலையில் வழக்கு திங்கட்கிழமை மீண்டும் விசாரணைக்கு வந்த நிலையில், ஆரம்ப புகாருக்குப் பிறகு மேலும் மூன்று எஃப்ஐஆர்கள் பதிவு செய்யப்பட்டதாக கம்ராவின் வழக்கறிஞர் நீதிமன்றத்தில் தெரிவித்தார். இதையடுத்து அவரது முன்ஜாமீன் ஏப்ரல் 17 வரை நீட்டிக்கப்பட்டுள்ளது.