மஹுவா மொய்த்ராவை தகுதி நீக்கம் செய்ய பரிந்துரை: ஓட்டெடுப்பில் நெறிமுறைகள் குழு ஏற்றது
செய்தி முன்னோட்டம்
அகில இந்திய திரிணாமுல் காங்கிரஸ் எம்பி மஹுவா மொய்த்ராவை, மக்களவையில் இருந்து தகுதி நீக்க பரிந்துரை செய்யும் அறிக்கையை நாடாளுமன்ற நெறிமுறைகள் குழு ஏற்றது.
இது தொடர்பாக நடைபெற்ற வாக்கெடுப்பில், 6-4 என்ற வாக்குகளில் அறிக்கை ஏற்றுக் கொள்ளப்பட்டது.
நெறிமுறைகள் குழுவில் இடம்பெற்று இருந்த 5 எம்பிக்கள் மற்றும் காங்கிரசைச் சேர்ந்த பிரனீத் கவுர் அறிக்கைக்கு ஆதரவாக வாக்களித்த நிலையில், 4 எதிர்க்கட்சி எம்பிக்கள் எதிராக வாக்களித்தனர்.
இந்த அறிக்கை, நாளை மக்களவை சபாநாயகர் ஓம் பிர்லாவிடம் வழங்கப்பட உள்ளது. மேலும் இது குறித்து அவர் முடிவெடுப்பார் எனவும் தெரிவிக்கப்பட்டுள்ளது.
பணம் வாங்கிய விவகாரம் தொடர்பான விசாரணையை மேற்கொள்ள, நெறிமுறைகள் குழு மத்திய அரசிடம் விட்டுவிட்டது குறிப்பிடத்தக்கது.
2nd card
மஹுவா மொய்த்ரா மீதான குற்றச்சாட்டுகள் என்ன?
நாடாளுமன்றத்தில் அதானி, பிரதமர் மோடிக்கு எதிராக கேள்வி கேட்க, ஹிராநந்தனி குழுமத்தின் தர்ஷனிடம் பணம் மற்றும் வெகுமதி வாங்கியதாக பாஜக எம்பி, மக்களவை சபாநாயகர் இடம் புகார் அளித்திருந்தார்.
இந்த புகாரை, நாடாளுமன்ற நெறிமுறைகள் குழுவின் விசாரணைக்கு சபாநாயகர் பரிந்துரைத்தார்.
இப்புகார் குறித்து விசாரித்து வந்த நாடாளுமன்ற நெறிமுறைகள் குழு, நாடாளுமன்ற லாகின் ஐடியை வெளிநபருடன் பகிர்ந்துகொண்டதற்காக "நெறிமுறையற்ற நடத்தை" மற்றும் "சபையின் அவமதிப்பு" உள்ளிட்ட குற்றச்சாட்டுகளை முன்வைத்திருந்தது.
மேலும், மொய்த்ராவின் செயலை 'கடுமையான தவறு' என கூறிய நெறிமுறைகள் குழு, இது குறித்து இந்திய அரசு குறிப்பிட்ட காலத்திற்குள் சட்டரீதியான விசாரணை நடத்த வேண்டும் என கூறியிருந்தது.
தற்போது, நெறிமுறைகள் குழுவின் அறிக்கை ஏற்றுக்கொள்ளப்படுவதற்கான வாக்கெடுப்பு வெற்றிபெற்றது குறிப்பிடத்தக்கது.