பள்ளி அருகே ஜங்க் ஃபுட் விற்பனைக்குத் தடை விதிக்க FSSAI திட்டம்; முழு விபரம்
செய்தி முன்னோட்டம்
இந்தியாவில் பள்ளி சிறுவர்களிடையே அதிகரித்து வரும் உடல் பருமன் மற்றும் ஆரோக்கியமற்ற உணவுப் பழக்கவழக்கங்களைக் கட்டுப்படுத்தும் நோக்கில், இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) புதிய கட்டுப்பாடுகளைக் கொண்டுவர ஆலோசித்து வருகிறது. அதன்படி, நாட்டின் சுமார் 15 லட்சம் பள்ளிகளில் இருந்து 50 மீட்டர் சுற்றளவுக்குள் அதிகக் கொழுப்பு, உப்பு மற்றும் சர்க்கரை (HFSS) கொண்ட ஜங்க் ஃபுட் உணவுகள், சாக்லேட்டுகள் மற்றும் பாக்கெட் பண்டங்களை விற்பனை செய்ய தடை அல்லது கடுமையான கட்டுப்பாடுகள் விதிக்கப்பட உள்ளன. கூடுதல் விபரங்கள் இங்கே:-
உடல் பருமன்
வேகமாக அதிகரிக்கும் சிறுவர் உடல் பருமன் மற்றும் சர்வதேச நிறுவனங்களுக்கான சவால்
உலக உடல் பருமன் கூட்டமைப்பின் தரவுகளின்படி, இந்தியாவில் 5 முதல் 19 வயதிற்குட்பட்ட உடல் பருமன் கொண்ட சிறுவர்களின் எண்ணிக்கை 2015-இல் 2.8 கோடியாக இருந்தது, 2025-இல் 4.1 கோடியாக உயர்ந்துள்ளது.
இந்த எண்ணிக்கை 2040-க்குள் 5.6 கோடியாக அதிகரிக்கும் என அஞ்சப்படுகிறது.
FSSAI அமைப்பின் இந்த புதிய முயற்சியால் பள்ளி அருகே உள்ள சிறுகடைகள் மட்டுமின்றி நெஸ்லே, பெப்சிகோ, கோகோ கோலா போன்ற முன்னணி பன்னாட்டு உணவு நிறுவனங்களும் தங்களது உற்பத்திப் பொருட்களில் சர்க்கரை மற்றும் கொழுப்பின் அளவைக் குறைக்க வேண்டிய கட்டாயத்திற்குத் தள்ளப்பட்டுள்ளன.
மகாராஷ்டிரா
மகாராஷ்டிரா அரசின் தீவிர நடவடிக்கையும் FSSAIயின் கருத்துக் கேட்பும்
இந்த மத்திய விதியை விட மகாராஷ்டிர மாநில அரசு ஒருபடி மேலே சென்று, பள்ளிக்கு அருகே உள்ள கடைகளில் ஜங்க் ஃபுட் பொருட்களை பாதுகாத்து வைப்பதற்கே முழுமையான தடை விதிக்கத் திட்டமிட்டுள்ளது.
ஏனெனில் கடைகளில் இருக்கும் பொருட்களை சிறுவர்களுக்கு விற்கிறார்களா இல்லையா என்பதைக் கண்காணிப்பது கடினம் என அம்மாநில உணவுப் பாதுகாப்பு ஆணையர் துக்காராம் முண்டே தெரிவித்துள்ளார்.
இந்த வரைவு விதிமுறைகள் குறித்துப் பொதுமக்கள் மற்றும் வணிகர்கள் தங்கள் கருத்துகளை அக்டோபர் 6 வரை தெரிவிக்கலாம் என FSSAI முதன்மை செயல் அதிகாரி ரஜித் புன்ஹானி தெரிவித்துள்ளார்.
ஆய்வு முடிவுகள்
சிலி நாட்டின் வெற்றிகரமான மாதிரி மற்றும் லான்செட் ஆய்வின் முடிவுகள்
உலகளவில் சிலி மற்றும் மெக்சிகோ போன்ற நாடுகள் ஏற்கனவே பள்ளிகளில் ஜங்க் ஃபுட் விற்பனைக்குக் கடுமையான தடைகளையும், பாக்கெட்டுகளில் எச்சரிக்கை லேபிள்களையும் கட்டாயமாக்கியுள்ளன.
லான்செட் இதழில் வெளியான ஆய்வின்படி, சிலி நாட்டில் இக்கட்டுப்பாடுகள் அமல்படுத்தப்பட்ட 18 மாதங்களில் சிறார்களின் அதிகப்படியான உடல் எடை விகிதம் பெண் குழந்தைகளிடம் 2.85 சதவீதமும், ஆண் குழந்தைகளிடம் 2.4 சதவீதமும் குறைந்துள்ளது.
அதேபோன்று இந்தியாவிலும் ஆரோக்கியமான தலைமுறையை உருவாக்கவே இந்த எச்சரிக்கை லேபிள் மற்றும் விற்பனைத் தடைகள் பரிசீலிக்கப்பட்டு வருகின்றன.