வெள்ளத்தில் இமாச்சலப் பிரதேசம்: கடும் மழையால் மக்கள் அவதி
செய்தி முன்னோட்டம்
இமாச்சலப் பிரதேசத்தில் தொடர்ந்து கனமழை பெய்து வருவதால், அடுத்த 48 மணி நேரத்திற்கு இமாச்சலப் பிரதேசத்தில் உள்ள ஏழு மாவட்டங்களுக்கு இந்திய வானிலை ஆய்வு மையம் சிவப்பு எச்சரிக்கை விடுத்துள்ளது.
மேலும், 3 மாவட்டங்களுக்கு ஆரஞ்சு எச்சரிக்கையும், இரண்டு மாவட்டங்களுக்கு மஞ்சள் எச்சரிக்கையும் விடுக்கப்பட்டுள்ளது.
இது தவிர, இமாச்சலப் பிரதேச மாநிலத்திற்கு நிலச்சரிவு மற்றும் திடீர் வெள்ள அபாய எச்சரிக்கையையும் அறிவிக்கப்பட்டுள்ளது.
"சம்பா, காங்க்ரா, குலு, மண்டி, உனா, ஹமிர்பூர் மற்றும் பிலாஸ்பூர் மாவட்டங்களுக்கு சிவப்பு எச்சரிக்கை விடுக்கப்பட்டுள்ளது. மாநிலத்தின் பெரும்பாலான இடங்களில் மழை பெய்யும். சிம்லா, சோலன் மற்றும் சிர்மௌர் மாவட்டங்களுக்கு ஆரஞ்சு எச்சரிக்கை விடுக்கப்பட்டுள்ளது" என்று இந்திய வானிலை ஆய்வு மையம் தெரிவித்துள்ளது.
சஜிக்க்
நிலச்சரிவில் சிக்கிய கல்லூரி மாணவர்கள் 30 பேர் பத்திரமாக மீட்கப்பட்டனர்
இமாச்சலப் பிரதேசத்தின் சிம்லா, லாஹவுல், ஸ்பிதி, சம்பா மற்றும் சோலன் மாவட்டங்களில் நிலச்சரிவு மற்றும் திடீர் வெள்ளம் காரணமாக பல சாலைகள் தடைப்பட்டுள்ளன.
அம்மாநிலத்தின் கிராம்பு கிராமம் மற்றும் சோட்டா தர்ரா ஆகிய இடங்களில் இன்று அதிகாலையில் ஏற்பட்ட நிலச்சரிவில் சிக்கித் தவித்த கல்லூரி மாணவர்கள் 30 பேர் பத்திரமாக மீட்கப்பட்டனர்.
நேற்று, சோலன் மாவட்டத்தில் ஏற்பட்ட நிலச்சரிவால் ஆறு வீடுகள் சேதமடைந்தன. இந்த சம்பவத்தில் உயிர் சேதம் ஏதும் ஏற்படவில்லை என தகவல்கள் தெரிவிக்கின்றன.
இதற்கிடையில், இமாச்சல பிரதேசத்தின் சிம்லாவில் இன்று பெய்த கனமழையால் ஒரு வீடு இடிந்து விழுந்ததில் ஒரே குடும்பத்தைச் சேர்ந்த 3 பேர் உயிரிழந்தனர், மேலும் இருவர் காயமடைந்தனர்.