நிர்மலா சீதாராமனின் இடைக்கால பட்ஜெட் 2024 உரையின் முக்கிய அம்சங்கள்
மத்திய நிதியமைச்சர் நிர்மலா சீதாராமன், மோடி அரசின் கடைசி பட்ஜெட்டை தாக்கல் செய்தார். தனது பட்ஜெட் உரையில், இந்தியாவின் பொருளாதாரம் பெரும் மாற்றத்தை சந்தித்து வருகிறது என்றார். ஏழைகள், பெண்கள், இளைஞர்கள் மற்றும் விவசாயிகளின் நிலைமைகளை மேம்படுத்துவதில் அரசாங்கம் கவனம் செலுத்துகிறது என்று குறிப்பிட்டு, இந்தப் பகுதிகளில் அறிவிக்கப்படும் நலத்திட்டங்களுக்கான முன்னோட்டத்தை தந்தார். நிர்மலா சீதாராமனின் 2024 இடைக்கால பட்ஜெட்டில் இருந்து நீங்கள் தெரிந்துகொள்ள வேண்டிய முக்கிய அம்சங்கள்: வருமான வரியில் எந்த மாற்றமும் இல்லை: நிதியமைச்சர் நிர்மலா சீதாராமன் 2025 நிதியாண்டுக்கான வருமான வரியில் எந்த மாற்றமும் இல்லை என்று அறிவித்தார். அதேபோல,நேரடி வரிகள் மற்றும் இறக்குமதி வரிகள் உள்ளிட்ட மறைமுக வரிகளுக்கு அதே வரி விகிதங்களைத் தக்கவைப்பதாகவும் அறிவித்தார்.
இடைக்கால பட்ஜெட் உரையின் முக்கிய அம்சங்கள்
நிதியாண்டுக்கான நிதிப்பற்றாக்குறை: புதுப்பிக்கப்பட்ட நிதிப் பற்றாக்குறை மதிப்பீடு, இந்த நிதியாண்டுக்கான மொத்த உள்நாட்டு உற்பத்தியில் 5.8 % உள்ளது எனவும், இது ஆரம்ப பட்ஜெட் மதிப்பீட்டை விட முன்னேற்றத்தைக் காட்டுகிறது எனவும் தெரிவித்தார். உள்கட்டமைப்பு திட்டங்கள்: உள்கட்டமைப்பில் அரசு முக்கிய கவனம் செலுத்தும். அடுத்த ஆண்டுக்கான செலவினம் 11.1% அதிகரித்து ரூ.11 லட்சம் கோடியாக உயர்த்தப்படுகிறது. மொத்த உள்நாட்டு உற்பத்தியில் இது 3.4% இருக்கும் என நிர்மலா சீதாராமன் கூறினார். தரம் உயர்த்தப்படும் ரயில்வே:உள்கட்டமைப்பின் ஒரு பகுதியாக போக்குவரத்து துறைக்கும் அறிவிப்புகள் வெளியாகின. 40,000 சாதாரண ரயில் பெட்டிகள், வந்தே பாரத் தரத்திற்கு உயர்த்தப்படும், விமான நிலையங்களின் எண்ணிக்கை 149 ஆக உயர்த்தப்படும் என்றும் நிதியமைச்சர் தெரிவித்தார்.
'விக்சித் பாரத்' தொலைநோக்கு முதல் ஆயுஷ்மான் பாரத் விரிவாக்கம் வரை
'விக்சித் பாரத்' தொலைநோக்கு: "விக்சித் பாரத்-க்கான எங்களின் பார்வை, இயற்கையுடன் இணக்கமான செழிப்பான பாரதம், நவீன உள்கட்டமைப்புகள், அனைத்து குடிமக்கள் மற்றும் அனைத்து பிராந்தியங்களும் தங்கள் திறனை அடைய வாய்ப்புகளை வழங்குவதாகும்," என்று அவர் கூறினார். இதற்காக மாநில அரசுகளுக்கு 50 -ஆண்டுகள் வட்டியில்லா கடனாக ரூ.75,000 கோடி வழங்கவும் அவர் முன்மொழிந்தார். ஆயுஷ்மான் பாரத் விரிவாக்கம்: அனைத்து ஆஷா பணியாளர்கள், அங்கன்வாடி பணியாளர்கள் மற்றும் உதவியாளர்களுக்கும் 'ஆயுஷ்மான் பாரத்' திட்டத்தின் கீழ் சுகாதார பாதுகாப்பு விரிவுபடுத்தப்படும் என நிதியமைச்சர் நிர்மலா சீதாராமன் தெரிவித்தார்
தனிக்கவனம் பெரும் நான்கு முக்கிய வகுப்புகள்
ஏழைகள், பெண்கள், இளைஞர்கள் மற்றும் விவசாயிகள் மீது கவனம்: இந்தப் பிரிவினருக்கு முன்னுரிமை அளிப்பதில் அரசு கவனம் செலுத்துகிறது என்றார் நிர்மலா சீதாராமன். நடுத்தர வர்க்கத்தினருக்கான வீட்டுவசதி: தற்போது வாடகை வீடுகள், குடிசைப்பகுதிகள், குடிசைகள் அல்லது அங்கீகரிக்கப்படாத காலனிகளில் வசிக்கும் நடுத்தர வர்க்கத்தின் தகுதியான பிரிவினரின் சொந்த வீடுகளை வாங்குவது அல்லது கட்டுவது என்ற அவர்களின் கனவை நனவாக்கும் நோக்கில் அரசாங்கம் ஒரு திட்டத்தை அறிமுகப்படுத்த உள்ளது என தெரிவித்தார். லட்சத்தீவில் பெரும் முதலீடு: இந்திய சுற்றுலாத் துறையில் குறிப்பிடத்தக்க அளவில் மத்திய அரசு முதலீடு செய்ய உள்ளதாக நிதியமைச்சர் நிர்மலா சீதாராமன் தெரிவித்துள்ளார். குறிப்பாக, லட்சத்தீவின் சுற்றுலா உள்கட்டமைப்பை மேம்படுத்துவதில் அரசாங்கம் கவனம் செலுத்தும் என தெரிவித்தார்.
