Loading...
தமிழக முதலீட்டு ரகசியங்களை ஆந்திராவிற்கு கசியவிட்ட 15 பேர் பணிநீக்கம்; ஆந்திர அரசு பணியில் இணைந்த மூவரால் சர்ச்சை
தமிழக முதலீட்டு ரகசியங்களை ஆந்திராவிற்கு கசியவிட்ட 15 பேர் பணிநீக்கம்

தமிழக முதலீட்டு ரகசியங்களை ஆந்திராவிற்கு கசியவிட்ட 15 பேர் பணிநீக்கம்; ஆந்திர அரசு பணியில் இணைந்த மூவரால் சர்ச்சை

எழுதியவர் Sekar Chinnappan
Nov 19, 2026
03:13 pm

செய்தி முன்னோட்டம்

தமிழகத்திற்கு வரவேண்டிய தொழில் முதலீடுகள் சமீபகாலமாக ஆந்திர மாநிலத்திற்கு செல்வதாக எதிர்க்கட்சிகள் தொடர்ந்து குற்றம் சாட்டி வரும் நிலையில், தமிழக அரசின் முதன்மை முதலீட்டு ஊக்குவிப்பு முகமையில் (Guidance Tamil Nadu) பணியாற்றிய 15 பேர் அதிரடியாக பணிநீக்கம் செய்யப்பட்டுள்ளனர். மாநில அரசுக்கு தொழில் முதலீடுகள் தொடர்பான ஆலோசனைகளை வழங்கி வரும் இந்த முகமையின் முக்கிய ரகசியங்களை ஆந்திர மாநிலத்திற்கு கசியவிட்டதாக எழுந்த புகாரைத் தொடர்ந்து இந்த நடவடிக்கை எடுக்கப்பட்டுள்ளது. கூடுதல் விவரங்கள் இங்கே:-

ஒப்பந்த ஊழியர்கள்

ரகசியக் காப்பு ஒப்பந்தம் இல்லாமல் ஒப்பந்த ஊழியர்கள் நியமிக்கப்பட்டதாகத் தகவல்

பணிநீக்கம் செய்யப்பட்டுள்ள இந்த 15 பேரும் ஒப்பந்த அடிப்படையில் பணியாற்றி வந்தவர்கள் என்பது தெரியவந்துள்ளது.

அரசின் முக்கியமான தொழில் முதலீட்டுத் திட்டங்கள் மற்றும் ரகசியங்களைப் பாதுகாப்பதற்கான ரகசியக் காப்பு ஒப்பந்தம் (NDA) அல்லது காப்புரிமை தொடர்பான எந்தவொரு சட்ட ஒப்பந்தமும் மேற்கொள்ளாமலேயே, முந்தைய ஆட்சிக் காலத்தில் இவர்கள் பணியில் சேர்க்கப்பட்டதாகத் தகவல்கள் வெளியாகியுள்ளன.

இது நிர்வாக ரீதியான பெரும் ஓட்டையாகப் பார்க்கப்படுகிறது.

ஆந்திர அரசில் இணைவு

ஆந்திர மாநில பொருளாதார மேம்பாட்டு வாரியத்தில் இணைந்த 3 முன்னாள் ஊழியர்கள்

இதற்கிடையே பணிநீக்கம் செய்யப்பட்டவர்களில் கிறிஸ்டோ லாரல், பிரபாகரன் அண்டி மற்றும் ப்ரீஜா பிரசாத் ஆகிய மூவரும் உடனடியாக ஆந்திர மாநிலப் பொருளாதார மேம்பாட்டு வாரியத்தில் (APEDB) இணைந்துள்ளனர்.

தாங்கள் ஆந்திர அரசு பணியில் இணைந்திருப்பதை இவர்கள் மூவரும் தங்களது சமூக ஊடகப் பக்கங்களில் அதிகாரப்பூர்வமாகத் தெரிவித்துள்ளது தமிழக அரசியல் மற்றும் தொழில் வட்டாரங்களில் பெரும் அதிர்வலைகளை ஏற்படுத்தியுள்ளது.

ADVERTISEMENT

சந்தேகம்

தமிழக முதலீட்டுத் தரவுகளுக்காக ஆந்திர அரசு உடனடியாக பணியமர்த்தியதா எனச் சந்தேகம்

தமிழகத்திற்கு வரவேண்டிய முதலீடுகள் ஆந்திராவிற்குத் திருப்பி விடப்படுவதாக எதிர்க்கட்சிகள் முன்வைத்து வரும் குற்றச்சாட்டுகளுக்குத் தவெக அரசு மறுப்பு தெரிவித்து வரும் நிலையில், இச்சம்பவம் புதிய சந்தேகங்களைக் கிளப்பியுள்ளது.

தமிழக முகமையில் பணியாற்றியபோதே இவர்கள் ஆந்திர அரசுடன் தொடர்பில் இருந்தார்களா என்றும், தமிழக அரசின் தொழில் முதலீடுகள் குறித்த ரகசிய விவரங்களை பெறுவதற்காகவே ஆந்திர அரசு இவர்கள் மூவரையும் உடனடியாகப் பணியில் சேர்த்ததா என்றும் பல்வேறு கேள்விகள் எழுந்துள்ளன.

ADVERTISEMENT