சேலம் விமான நிலையத்திலிருந்து 2 ஆண்டுகளுக்கு பிறகு மீண்டும் விமான சேவை
செய்தி முன்னோட்டம்
சேலம் மாவட்டம் ஓமலூர் அடுத்துள்ள கமலாபுரம் என்னும் பகுதியில் சேலம் விமான நிலையம் அமைந்துள்ளது.
இங்கிருந்து சென்னைக்கு தினசரி விமான சேவை ட்ரூ ஜெட் என்னும் நிறுவனம் மூலம் செயல்பட்டது.
இதனிடையே கடந்த 2021ம் ஆண்டு ஜூன் மாதம் இந்த விமான சேவை கொரோனா காலகட்டத்தில் நிறுத்தப்பட்டது என்று கூறப்படுகிறது.
விமான சேவை நிறுத்தப்பட்டு 2 ஆண்டுகளுக்கு பிறகு மீண்டும் தற்போது இந்த விமான சேவையினை துவங்கப்போவதாக கடந்த ஜூலை மாதம் அறிவிப்புகள் வெளியானது.
இது குறித்து ஸ்பைஸ் ஜெட், இண்டிகோ, ஸ்டார் ஏர் உள்ளிட்ட விமான நிறுவனங்களுடன் பேச்சுவார்த்தையும் நடந்தது என்று செய்திகளும் வெளியானது.
அதன்படி வரும் அக்.,16ம் தேதி முதல் சேலத்திலிருந்து விமான சேவை துவங்கும் என்று அறிவிக்கப்பட்டது.
சேவை
வாரத்தின் 7 நாட்களும் சென்னை-சேலம் விமான சேவை
இதுகுறித்து சேலம் நாடாளுமன்ற உறுப்பினர் எஸ்.ஆர்.பார்த்திபன் கூறுகையில், 'வரும் 16ம் தேதி முதல் அலையன்ஸ் நிறுவனம் சார்பில் வாரத்தில் புதன் மற்றும் வெள்ளிக்கிழமைகளை தவிர மீதமுள்ள 5 நாட்கள் இருவழி மார்க்கமாக பெங்களூர்-சேலம்-கொச்சி வழித்தடத்தில் விமான சேவைகள் துவங்கப்படும்' என்று கூறியுள்ளார்.
மேலும் அவர், 'அதே போல் இம்மாத இறுதியில் 29ம் தேதி முதல் இண்டிகோ நிறுவனம் சார்பில் வாரத்தில் 4 நாட்கள் பெங்களூர்-சேலம்-ஹைதராபாத் வழித்தடத்தில் இருவழி மார்க்கமாக விமான சேவை துவங்கும்' என்றும் தெரிவித்தார்.
ஞாயிறு, புதன், வெள்ளிக்கிழமைகளில் இண்டிகோ விமானம் இயக்கப்படாது என்றும் கூறப்பட்டுள்ளது.
இதனை தொடர்ந்து, சென்னை-சேலம் விமான சேவையானது வாரத்தின் 7 நாட்களுக்கும் செயல்படுத்த இண்டிகோ நிறுவனம் முன்வந்துள்ளது என்றும் அவர் தெரிவித்துள்ளார்.