தேர்தல் 2024: கவனம் ஈர்க்கும் திண்டுக்கல் தொகுதி கள நிலவரம்
செய்தி முன்னோட்டம்
வரவிருக்கும் நாடாளுமன்ற தேர்தலுக்கான பிரசாரம் இன்று மாலையுடன் நிறைவடைய உள்ள நிலையில், இறுதிக்கட்ட வாக்குவேட்டை தீவிரமடைந்துள்ளது.
ஒவ்வொரு வேட்பாளர்களும் நூதன முறையில் வாக்காளர்களை கவர்ந்து வருகின்றனர்.
இதனிடையே பல ஊடகங்களில் வெளியாகும் கருத்துக்கணிப்பு முடிவுகளும் வெளியாகி களநிலவரத்தை சூடாக்கி வருகிறது.
குறிப்பாக இந்தமுறை திண்டுக்கல் நாடாளுமன்ற தொகுதி நிலவரம் குறித்து தமிழ்நாடு டைம்ஸ் நடத்திய கருத்துக்கணிப்பு முடிவுகள் கவனம் ஈர்த்துள்ளது.
கடந்த 2019ம் ஆண்டு நடந்த தேர்தலில் திண்டுக்கல் மக்களவை தொகுதியில் 75 சதவீத வாக்குகள் பதிவாகின.
இதில் திமுக வேட்பாளர் வேலுச்சாமி 7,46,523 வாக்குகள் பெற்று 5,38,972 வாக்குகள் வித்தியாசத்தில் வெற்றி பெற்றார்.
அவரை எதிர்த்து போட்டியிட்ட பாமக வேட்பாளரான ஜோதிமுத்து 2,07,551 வாக்குகளைப் பெற்றார்.
மாறும் காட்சிகள்
பாமக வேட்பாளருக்கு வீசும் சாதகமான அலை
தற்போது தமிழ்நாடு டைம்ஸ் நடத்திய கருத்துக்கணிப்பில் இதே திண்டுக்கல் தொகுதியில் திமுக, அதிமுக வேட்பாளர்களை விட பாமக வேட்பாளர் திலகபாமா அதிக வாக்குகளைப் பெறுவார் என தெரிவித்துள்ளது.
கருத்துக்கணிப்பு முடிவுகளின் படி, திமுக கூட்டணி கட்சியான கம்யூனிஸ்ட் கட்சி 28.80 சதவீத வாக்குகளையும், அதிமுகவின் கூட்டணி கட்சியான எஸ்டிபிஐ 15.57 சதவீத வாக்குகளையும் பெறும் என தெரிவிக்கப்பட்டுள்ளது.
பாஜக தலைமையிலான தேசிய ஜனநாயக கூட்டணி கட்சியின் பாமக வேட்பாளர் திலகபாமா 35.23 சதவீத வாக்குகள், அதாவது கிட்டத்தட்ட 3,90,109 ஓட்டுக்களை பெற்று வெற்றி பெறுவார் என கணித்துள்ளது.
காரணிகள்
திலகபாமாவின் சாத்தியமான வெற்றிக்கு கூறப்படும் காரணிகள்
கருத்துக்கணிப்பின் முடிவுகளின் படி, திலகபாமாவின் வெற்றிக்கு காரணமாக அமையவிருப்பது அவர் முன்னெடுத்த டாஸ்மாகிற்கு எதிரான தொடர் போராட்டங்கள் எனக்கூறப்படுகிறது.
இந்த போராட்டங்கள் மூலமாக மக்களிடையே பரிட்சையமான திலகபாமாவிற்கு, திண்டுக்கல் தொகுதியில் பெண் வாக்காளர்களின் ஆதரவு அமோகமாக அதிகரித்துள்ளது.
மேலும் ஒருபுறம் திமுக,அதிமுக இரண்டும் தனது சொந்த கட்சி வேட்பாளர்களுக்குப் பதிலாக கூட்டணி கட்சியினரைக் களமிறக்கியுள்ளதும், பெண் வாக்காளர்கள் அதிகமுள்ள திண்டுக்கல் மக்களவை தொகுதியில் பாமக பெண் வேட்பாளரை போட்டியிட வைத்ததும் பாசிட்டிவ் பாயிண்ட்களாக அமைந்துள்ளன.
அதோடு விவசாயிகள், பெண்கள், இளைஞர்கள் ஆகியோரின் வாழ்க்கைத் தரம் உயரும் வகையில் திலகபாமா அறிவித்துள்ள வாக்குறுதிகளும், விவசாயம் மற்றும் தொழில் வளர்ச்சி தொடர்பான அறிவிப்புகளும் மக்களை கவர்ந்துள்ளது என அந்த கருத்துக்கணிப்பு தெரிவிக்கிறது.