சூடனில் இருக்கும் இந்திய தூதரகத்திற்கு செல்ல வேண்டாம்: இந்திய அரசு எச்சரிக்கை
செய்தி முன்னோட்டம்
சூடானில் உள்ள இந்தியர்களை அந்நாட்டின் தலைநகர் கார்ட்டூமில் உள்ள இந்திய தூதரகத்திற்குச் செல்ல வேண்டாம் என்று இந்திய அரசாங்கம் கேட்டுக் கொண்டது.
சூடான் தலைநகரில் அந்நாட்டின் இராணுவத் தளபதி அப்தெல் ஃபத்தா அல்-புர்ஹானுக்கும் துணைத் தலைவரான முகமது ஹம்தான் டாக்லோவுக்கும் இடையே சண்டை நடந்து வருவதால் இந்த எச்சரிக்கை விடுக்கப்பட்டுள்ளது.
தூதரகம் செயல்பட்டு கொண்டுதான் இருக்கிறது, ஆனால் கார்ட்டூமில் உள்ள விமான நிலையத்திற்கு அருகில் இந்திய தூதரக கட்டிடம் அமைந்திருப்பதால் எந்த ஊழியர்களும் அங்கு வேலை செய்யவில்லை.
தூதரக கட்டிடத்திற்கு அருகில் இருக்கும் விமான நிலையத்தில் தான் அந்நாட்டின் ராணுவம் மற்றும் துணை ராணுவத்திற்கு இடையே சண்டை நடந்து கொண்டிருக்கிறது என்பது குறிப்பிடத்தக்கது.
சூடான்
மின்சாரம், உணவு மற்றும் தண்ணீர் கூட இல்லாமல் தவிக்கும் மக்கள்
"நாங்கள் இந்தியர்களுக்கு எப்படி பாதுகாப்பாக இருக்க வேண்டும் என்று ஆலோசனை வழங்கி வருகிறோம். இது ஒரு வளர்ந்து வரும் பிரச்சனை. தூதரகம் செயல்படுகிறது, ஆனால் அந்த பகுதியில் நிறைய சண்டைகள் நடப்பதால் யாரும் அங்கு நேரில் செல்ல வேண்டாம் என்று நாங்கள் கூறியுள்ளோம். தூதரக கட்டிடத்திற்குள் யாரும் இல்லை." என்று வெளியுறவு அமைச்சக செய்தித் தொடர்பாளர் அரிந்தம் பாக்சி இன்று செய்தியாளர்களிடம் தெரிவித்தார்.
சனிக்கிழமை ஆரம்பித்த இந்த சண்டையால் கிட்டத்தட்ட 300 பேர் கொல்லப்பட்டுள்ளனர்.
ஐந்து மில்லியன் மக்கள் வசிக்கும் கார்டூமில் இதற்கு முன் நிறைய கடுமையான போர்கள் நடந்துள்ளன. தற்போது கார்டூமில் வசிப்பவர்கள் மின்சாரம், உணவு மற்றும் தண்ணீர் கூட இல்லாமல் தங்கள் வீடுகளில் அடைபட்டு கிடக்கின்றனர்.