எடப்பாடி பழனிச்சாமிதான் முதல்வர் வேட்பாளர்; பாஜக தலைவர் நயினார் நாகேந்திரன் உறுதி
செய்தி முன்னோட்டம்
வரவிருக்கும் 2026 மாநில சட்டமன்றத் தேர்தலில் அதிமுக-பாஜக கூட்டணிக்கு எடப்பாடி பழனிச்சாமி முதல்வர் வேட்பாளராக இருப்பார் என்று பாஜக தமிழ்நாடு தலைவர் நயினார் நாகேந்திரன் உறுதியாகக் கூறியுள்ளார். மத்திய உள்துறை அமைச்சர் அமித்ஷா சமீபத்தில் அளித்த நேர்காணல் ஒன்றில், எடப்பாடி பழனிச்சாமியை முதல்வர் வேட்பாளராக நேரடியாகக் குறிப்பிடுவதைத் தவிர்த்ததால், விவாதங்கள் எழுந்தது. இந்நிலையில், இந்த விவாதங்கள் குறித்து செய்தியாளர்களிடம் பேசிய நயினார் நாகேந்திரன், "முதல்வர் வேட்பாளர் குறித்து எந்த குழப்பமும் இல்லை. அமித்ஷா ஏற்கனவே எடப்பாடி பழனிசாமியின் பெயரைக் குறிப்பிட்டுள்ளார். தேர்தல் அதிமுக தலைமையில் போட்டியிடப்பட உள்ளதால், அவரே முதல்வர் வேட்பாளராக இருப்பார்." எனக் கூறினார்.
அமித்ஷா பேட்டி
அமித்ஷா பேட்டியின் விபரங்கள்
அமித்ஷா ஒரு நாளிதழுக்கு அளித்த பேட்டியில், அதிமுகவில் உள்ள பிளவுபட்ட பிரிவுகளை சமரசம் செய்ய எந்த முயற்சியும் எடுக்கவில்லை என்றும், அதிமுக கட்சி தனது உள் விவகாரங்களை சுயமாக தீர்க்க வேண்டும் என்றும் கூறியிருந்தார். மேலும், தமிழகத்தில் தேசிய ஜனநாயகக் கூட்டணி ஆட்சி அமைக்கும் என்றும், அதில் பாஜகவுக்கு குறிப்பிடத்தக்க பங்கு இருக்கும் என்றும் அவர் வலியுறுத்தினார். இதற்கிடையே, மேலும் கேள்விகளுக்கு பதிலளித்த நயினார் நாகேந்திரன், அமித்ஷா மற்றும் எடப்பாடி பழனிச்சாமி இடையேயான பரஸ்பர முடிவுகளின் அடிப்படையில் தமிழ்நாட்டில் கூட்டணி அரசு அமைக்கப்படும் என்றும் கூறினார். தமிழக வெற்றிக் கழகம் கூட்டணியில் சேருமா என்ற கேள்விக்கு நல்லதே நடக்கும் என நயினார் நாகேந்திரன் மேலும் கூறினார்.