டித்வா புயல் எச்சரிக்கை: சென்னையில் 75 கிமீ வேகத்தில் சூறைக்காற்று வீச வாய்ப்பு
செய்தி முன்னோட்டம்
வங்கக்கடலில் நிலைகொண்டிருக்கும் டித்வா புயல் சென்னையை நெருங்கும்போது, புயலாகவே நீடிக்கும் என இந்திய வானிலை ஆய்வு மையம் தெரிவித்துள்ளது. இதன் எதிரொலியாக, சென்னையில் சனிக்கிழமை (நவம்பர் 29) மணிக்கு 75 கிமீ வேகத்தில் சூறைக்காற்று வீசக்கூடும் என்று வானிலை ஆய்வு மைய தென்மண்டலத் தலைவர் அமுதா தெரிவித்துள்ளார். சென்னையில் சனி மற்றும் ஞாயிற்றுக்கிழமைகள் விட்டுவிட்டு கனமழை பெய்ய வாய்ப்புள்ளது. குறிப்பாக, சனிக்கிழமை இரவு முதல் கனமழைக்கான வாய்ப்பு அதிகம் உள்ளதாகவும் அவர் குறிப்பிட்டுள்ளார். மழை படிப்படியாக டிசம்பர் 1 ஆம் தேதி முதல் குறையத் தொடங்கும்.
ரெட் அலெர்ட்
ரெட் அலர்ட் எச்சரிக்கை
இருப்பினும், டிசம்பர் 1 ஆம் தேதி திருவள்ளூர் மாவட்டத்தில் மட்டும் கனமழை பெய்யக்கூடும் என்று கணிக்கப்பட்டுள்ளது. இதற்கிடையே, திருவள்ளூர் மற்றும் ராணிப்பேட்டை ஆகிய இரண்டு மாவட்டங்களுக்கு அதி கனமழைக்கான ரெட் அலர்ட் எச்சரிக்கை விடுக்கப்பட்டுள்ளது. கடந்த 24 மணி நேரத்தில் வடகிழக்குப் பருவமழை கடலோர மாவட்டங்களில் கடுமையாக இருந்தது. அதிகபட்சமாக, கடந்த 6 மணிநேரத்தில் காரைக்காலில் 13 செமீ மழை பதிவாகியுள்ளது என்றும் வானிலை ஆய்வு மையம் தெரிவித்துள்ளது. புயல் நெருங்கி வருவதால், சென்னை மற்றும் அதைச் சுற்றியுள்ள மக்கள் மிகுந்த எச்சரிக்கையுடன் இருக்க அறிவுறுத்தப்படுகிறார்கள்.