மிக்ஜாம் புயலால் சென்னையில் 19 பேர் உயிரிழப்பு; இன்னும் இயல்பு நிலைக்கு திரும்பாத தலைநகரம்
செய்தி முன்னோட்டம்
தமிழ்நாட்டின் தலைநகரில் இரு தினங்களுக்கு முன்னர் கோரத்தாண்டவம் ஆடி சென்ற மிக்ஜாம் புயலின் தாக்கத்திலிருந்து சென்னை மெல்ல மெல்ல மீண்டு வருகிறது.
இந்த புயல் பாதிப்பில் ஏற்கனவே 7 பேர் உயிரிழந்துள்ளனர் என கூறப்பட்ட நிலையில், நேற்று மேலும் 12 பேர் உயிரிழந்துள்ளதாக தெரிவிக்கப்பட்டுள்ளது.
இதனால், புயலினால் இறந்தவர்கள் எண்ணிக்கை 19 என அதிகரித்துள்ளது.
இதில் ஐசிஃப் தலைமை காவலதிகாரியும் ஒருவர். அவர் கீழ்பாக்கம் காவலர் குடியிருப்பில் வசித்து வந்ததாகவும், திங்கட்கிழமை பணி முடித்துவிட்டு இரவு இரு சக்கர வாகனத்தில் கிளம்பியவர், வெள்ள நீரில் சிக்கி உயிரிழந்துள்ளதாக தெரிவிக்கப்பட்டுள்ளது.
இது போல பல உயிர்கள், இந்த மழையில் பறிபோயுள்ளது. இத்தனைக்கும் காரணமாக இருந்த மிக்ஜாம் புயல், நேற்று ஆந்திர மாநிலத்தில் கரையை கடந்தது.
card 2
இயல்பு நிலை நோக்கி சென்னை
சென்னையில் நேற்று மழை நின்றுவிட்ட போதிலும், பல இடங்களில் வெள்ள நீர் விடியவில்லை.
மயிலாப்பூர், திருவல்லிக்கேணி, பள்ளிக்கரணை போன்ற இடங்களில் மழை நீருடன், கழிவு நீரும் கலந்து விட்டதாக செய்திகள் தெரிவிக்கப்படுகிறது.
அதே நேரத்தில் மழை நீர் இன்னும் முற்றிலுமாக வடியாததால், பல இடங்களில் மின்சார இணைப்பும் துண்டிக்கப்பட்டுள்ளது.
48-மணிநேரத்திற்கு மேலாக பல இடங்கள் இருளில் மூழ்கியுள்ளது. தொலைத்தொடர்பு சேவையும் பாதிக்கப்பட்டதால், பொதுமக்கள் மிகவும் அவதிக்குள்ளாகியுள்ளனர்.
இருப்பினும், மின்சார ரயில் சேவைகள் நேற்று துவங்கி விட்டது. தண்டவாளத்தில் மழை நீர் தேங்கியுள்ளதால், போக்குவரத்தில் மாற்றம் செய்யப்பட்டு இயக்கப்படுகிறது.
மின்சாரம் துண்டிப்பு, பால் விநியோகம் பாதிப்பு போன்றவற்றிற்கு நிவாரணம் கோரி, நேற்று, அண்ணாநகர் மற்றும் திருமங்கலம் அருகே மக்கள் மறியல் செய்த சம்பவங்களும் நடந்தேறின.