நவம்பர் 15 முதல் செயல்பாட்டிற்கு வரும் சென்னை விமான நிலையத்தின் நான்காவது முனையம்
செய்தி முன்னோட்டம்
சென்னை விமான நிலையத்தின் நான்காவது முனையத்தில் (Terminal 4) மேற்கொள்ளப்பட்டு வந்த மறுசீரமைப்புப் பணிகள் முடிவடைந்த நிலையில், வரும் நவம்பர் 15ம் தேதி முதல் அதனை செயல்பாட்டிற்கு கொண்டு வரவிருக்கிறது AAI (Airport Authority of India).
முன்னதாக சென்னை விமான நிலையத்தின் இரண்டாவது மற்றும் மூன்றாவது முனையங்களை ஒன்றாக சேர்க்கப்பட்டு ஒருங்கிணைந்த முனையமாக மாற்றப்பட்டு, கடந்த ஜூலை மாதம் சர்வதேச விமானப் பயணிகளின் பயன்பாட்டிற்காகத் திறக்கப்பட்டது.
அதனைத் தொடர்ந்து, முன்னர் சர்வதேச முனையமாக செயல்பட்டு வந்த நான்காவது முனையத்தின் மறுசீரமைப்புப் பணிகள் தொடங்கி கடந்த மூன்று மாதங்களாக நடைபெற்று வந்தது.
சென்னை
உள்நாட்டு முனையமாக செயல்படும்:
சர்வதேச முனையமாக செயல்பட்டு வந்த நான்காவது முனையமானது, மறுசீரமைப்புக்குப் பிறகு இனி நவம்பர் 15ம் தேதி முதல் உள்நாட்டு முனையமாக செயல்படவிருக்கிறது.
முன்னர் நான்காவது முனையத்தில் செயல்பட்டு வந்த இம்மிகிரேஷன் கவுண்டர்கள் ஒருங்கிணைந்த சர்வதேச முனையத்திற்கு மாற்றப்பட்டதைத் தொடர்ந்து, அந்த இடங்களில் பயணிகளின் வசதிக்காக கன்வேயர் பெல்ட்கள் அமைக்கப்பட்டிருக்கின்றன.
மேலும், ஏர் இந்தியா மற்றும் ஏர் இந்தியாவின் கூட்டு விமானங்களின் உள்நாட்டு பயண நடவடிக்கைகள் அனைத்தும் நான்காவது முனையத்திற்கு மாற்றப்படவிருப்பதாகவும் தெரிவிக்கப்பட்டுள்ளது.
இந்தியாவின் முக்கியமான விமான நிலையங்களுள் ஒன்றாக செயல்பட்டு வரும் சென்னை விமான நிலையமானது, கடந்த செப்டம்பர் மாதம் மட்டும் 12.36 லட்சம் பயணிகளைக் கையாண்டிருக்கிறது. இது கடந்த ஆண்டு செப்டம்பரை விட 13.8% அதிகம் என்பது குறிப்பிடத்தக்கது.