நவ.16-ல் புயல் எச்சரிக்கை: மீனவர்கள் நாளைக்குள் கரை திரும்ப வானிலை மையம் அறிவுறுத்தல்
செய்தி முன்னோட்டம்
தென்கிழக்கு வங்கக்கடல் பகுதியில் நிலவி வந்த காற்றழுத்தத் தாழ்வுப் பகுதி தற்போது ஆழ்ந்த காற்றழுத்தத் தாழ்வுப் பகுதியாகத் தீவிரமடைந்துள்ளது. இது அடுத்த 24 மணி நேரத்தில் காற்றழுத்தத் தாழ்வு மண்டலமாக வலுப்பெற்று, வடக்கு-வடமேற்கு திசையில் நகர்ந்து வரும் நவம்பர் 16 ஆம் தேதி மாலையளவில் மத்திய வங்கக்கடல் பகுதியில் புயலாக உருவெடுக்கக்கூடும் என இந்திய வானிலை ஆய்வு மையம் கணித்துள்ளது. இதன் காரணமாக கடலோரப் பகுதிகளில் பாதுகாப்பு முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன.
அவசர அறிவுறுத்தல்
ஆழ்கடல் மீனவர்கள் நவம்பர் 15-க்குள் பாதுகாப்பாகக் கரை திரும்ப அவசர அறிவுறுத்தல்
புயல் உருவாகும் சூழலால் வங்கக்கடலில் மணிக்கு 60 முதல் 80 கிலோமீட்டர் வேகத்தில் பலத்த சூறாவளிக் காற்று வீசக்கூடும் என எச்சரிக்கப்பட்டுள்ளது.
கடல் மிகவும் கொந்தளிப்பாக காணப்படும் என்பதால், ஏற்கனவே ஆழ்கடலுக்கு மீன்பிடிக்க சென்றுள்ள அனைத்து மீனவர்களும் உடனடியாக கரைக்குத் திரும்புமாறு வானிலை ஆய்வு மையம் கேட்டுக்கொண்டுள்ளது.
குறிப்பாக வரும் நவம்பர் 15 ஆம் தேதிக்குள் மீனவர்கள் தங்களது படகுகளுடன் துறைமுகங்களுக்குத் திரும்பிவிட வேண்டும் எனக் கடுமையாக அறிவுறுத்தப்பட்டுள்ளது.
தேதிகள்
கடல் பகுதி வாரியாக மீனவர்கள் செல்லத் தடை விதிக்கப்பட்டுள்ள தேதிகள்
வானிலை ஆய்வு மையத்தின் அறிவிப்பின்படி, அந்தமான் கடல், அந்தமான் நிக்கோபார் தீவுகள் மற்றும் தென்கிழக்கு வங்கக்கடல் பகுதிகளுக்கு வரும் நவம்பர் 17-ஆம் தேதி வரை மீனவர்கள் செல்ல வேண்டாம் என அறிவுறுத்தப்பட்டுள்ளது.
மேலும் தென்மேற்கு வங்கக்கடல் பகுதிக்கு நவம்பர் 15 முதல் 18-ஆம் தேதி வரையும், மத்திய வங்கக்கடல் பகுதிக்கு நவம்பர் 16 முதல் 19-ஆம் தேதி வரையும் மீன்பிடிக்கச் செல்வது முற்றிலும் தடை செய்யப்பட்டுள்ளது.
முன்னெச்சரிக்கை
செவ்வாய்க்கிழமை வரை தமிழகத்தின் வானிலை நிலவரம் மற்றும் முன்னெச்சரிக்கைகள்
இந்த புயல் சின்னம் மத்திய வங்கக்கடல் நோக்கி நகர்வதால், வரும் செவ்வாய்க்கிழமை வரை தமிழகத்தில் பெரிய அளவில் பரவலான கனமழைக்கு வாய்ப்பில்லை எனத் தெரிவிக்கப்பட்டுள்ளது.
பெரும்பாலான மாவட்டங்களில் வறண்ட வானிலையோ அல்லது ஓரிரு இடங்களில் லேசான மழையோ மட்டுமே பெய்யக்கூடும்.
இருப்பினும் புயலின் நகர்வுக்கேற்ப வானிலையில் மாற்றங்கள் ஏற்படலாம் என்பதால், மீனவர்களும் பொதுமக்களும் அரசு மற்றும் வானிலை மையத்தின் அறிவிப்புகளைத் தொடர்ந்து கவனிக்க வேண்டும் எனக் கேட்டுக்கொள்ளப்பட்டுள்ளது.