ஜனவரி 27-க்குள் வெள்ள பாதிப்புக்கு ஏற்ப நிவாரண தொகை வழங்கப்படும்: அமித் ஷா உறுதி
செய்தி முன்னோட்டம்
வெள்ள நிவாரண நிதியை விரைந்து அனுப்ப கோரி, நேற்று டெல்லியில் மத்திய உள்துறை அமைச்சர் அமித் ஷாவை தமிழக எம்.பி.க்கள் குழுவினர் சந்தித்து பேசினர்.
முதல்வர் ஸ்டாலின் மத்திய அரசிற்கு அனுப்பி இருந்த கோரிக்கை கடிதத்தின் படி, வெள்ள நிவாரண தொகை ரூ.37,907 கோடியை விரைந்து வழங்குமாறு மீண்டும் கோரிக்கை மனு அளித்தனர்.
அதற்கு பதிலளித்த உள்துறை அமைச்சர் அமித் ஷா, மத்திய குழுவினரின் அறிக்கை கிடைத்தவுடன், பாதிப்புக்கு ஏற்ப ஜனவரி 27-ம் தேதிக்குள் நிதி வழங்கப்படும் என உறுதியளித்ததாக திமுக நாடாளுமன்ற குழு தலைவர் டி.ஆர்.பாலு தெரிவித்தார்.
card 2
பிரதமரிடம் கோரிக்கை விடுத்த முதல்வர் ஸ்டாலின்
கடந்த ஆண்டு டிசம்பர் 3, 4-ம் தேதிகளில் தமிழகத்தை தாக்கிய மிக்ஜாம் புயலால், சென்னை, திருவள்ளூர், செங்கல்பட்டு, காஞ்சிபுரம் ஆகிய 4 வட மாவட்டங்களும், அதீத பருவமழை காரணமாக டிசம்பர் 17, 18-ஆம் தேதிகளில் தூத்துக்குடி, திருநெல்வேலி, கன்னியாகுமரி, தென்காசி ஆகிய 4 தென் மாவட்டங்களும் பாதிக்கப்பட்டன.
இந்த இரு பேரிடர்களால் பாதிக்கப்பட்ட பகுதிகளில் சீரமைக்க, நிவாரண பணிக்காக 4 வட மாவட்டங்களுக்கு ரூ.19,692.69 கோடி, 4 தென் மாவட்டங்களுக்கு ரூ.18,214.52 கோடி என மொத்தம் ரூ.37,907.21 கோடி நிவாரண தொகை வழங்குமாறு மத்திய அரசிடம் தமிழக அரசு கோரிக்கை வைத்து.
இது குறித்து கடந்த மாதம் டெல்லி சென்றபோது, முதலமைச்சர் ஸ்டாலின், பிரதமர் மோடியிடம் வலியுறுத்தினார்.