கெஜ்ரிவால் கைது எதிரொலி: இன்று இந்தியா மற்றும் வெளிநாடுகளில் ஆம் ஆத்மியின் 'மாஸ் உண்ணாவிரதம்'
செய்தி முன்னோட்டம்
அரவிந்த் கெஜ்ரிவால் கைது செய்யப்பட்டதற்கு எதிர்ப்பு தெரிவித்து ஆம் ஆத்மி கட்சி மாபெரும் உண்ணாவிரத போராட்டத்திற்கு திட்டமிட்டுள்ளது.
இந்தியா முழுவதும் மற்றும் பல சர்வதேச நகரங்களில் இந்த உண்ணாவிரத போராட்டத்திற்கு திட்டமிடப்பட்டுள்ளன.
இன்று காலை 10 மணி முதல் ஆம் ஆத்மி எம்எல்ஏக்கள், எம்பிக்கள், அலுவலக பணியாளர்கள், கட்சி தொண்டர்கள் மற்றும் ஆதரவாளர்களுடன் புது டெல்லியில் உள்ள ஜந்தர் மந்தர், பஞ்சாபில் கலன் மற்றும் புரட்சிகர சுதந்திரப் போராட்ட வீரர் பகத்சிங்கின் கிராமமான கத்கர் ஆகிய இடங்களில் உண்ணாவிரத போராட்டம் நடைபெறும் என்று டெல்லி அமைச்சர் கோபால் ராய் தெரிவித்தார்.
கெஜ்ரிவாலின் கைதுக்கு பின்னால் இருக்கும் மதுக் கொள்கை வழக்கு புனையப்பட்டது என்றும், அது பாஜகவின் சதி என்றும் ஆம் ஆத்மி கூறுகிறது.
உண்ணாவிரத போராட்டம்
சர்வதேச அளவில் உண்ணாவிரத போராட்டம்
இந்தியா மட்டுமின்றி, அமெரிக்காவின் நியூயார்க், பாஸ்டன், லாஸ் ஏஞ்சல்ஸ் மற்றும் வாஷிங்டன் டிசி, கனடாவின் டொராண்டோ, ஆஸ்திரேலியாவின் மெல்போர்ன் மற்றும் இங்கிலாந்தின் லண்டன் உள்ளிட்ட இந்தியாவின் 25 நாடுகளின் தலைநகரங்களில் உண்ணாவிரதம் கடைப்பிடிக்கப்படும் என்று ஆம் ஆத்மி டெல்லி பிரிவு தலைவர் மேலும் கூறினார்.
"மோடி அரசின் சர்வாதிகாரத்துக்கு எதிராகவும், அரவிந்த் கெஜ்ரிவாலுக்கு ஆதரவாகவும் இந்தியாவிலும், உலகெங்கிலும் வாழும் இந்தியர்களின் குரல் ஓங்கி ஒலித்து வருகிறது. அவரை (கெஜ்ரிவாலை) கைது செய்ய மத்திய அரசு சதி செய்து ஏஜென்சிகளை தவறாகப் பயன்படுத்திய விதம் அம்பலமாகி வருகிறது" கோபால் ராய் கூறினார்.
ஏப்ரல் 1ஆம் தேதி, மதுபானக் கொள்கை வழக்கில் கைது செய்யப்பட்ட அரவிந்த் கெஜ்ரிவால் 14 நாள் நீதிமன்றக் காவலில் வைக்கப்பட்டார்.