எம்பி ஸ்வாதி மாலிவாலின் சிசிடிவி வீடியோவை வெளியிட்டது ஆம் ஆத்மி கட்சி
செய்தி முன்னோட்டம்
டெல்லி முதல்வர் அரவிந்த் கெஜ்ரிவாலின் வீட்டில், ஆம் ஆத்மி எம்பி ஸ்வாதி மாலிவால் தாக்கப்பட்டதாக எழுந்த குற்றச்சாட்டை அடுத்து, ஆம் ஆத்மி கட்சி (ஏஏபி) புதிய சிசிடிவி வீடியோவை வெளியிட்டுள்ளது.
ஸ்வாதி மாலிவால் முதல்வரின் வீட்டில் இருந்து பாதுகாப்புப் பணியாளர்களால் அழைத்துச் செல்லப்படுவதைக் காட்டும் வீடியோ அதுவாகும்.
ஸ்வாதி மாலிவால் மே 13 அன்று பாதுகாப்புப் பணியாளர்களுடன் நடந்து செல்லும் அவரது கால்களில் எந்த பிரச்னையும் இல்லை என்று ஆம் ஆத்மி கட்சி கூறுகிறது.
சம்பவம் நடந்து நான்கு நாட்களுக்குப் பிறகு ஸ்வாதி மாலிவால் நொண்டி நடப்பது போல் நடித்திருக்கிறார் என்று ஆம் ஆத்மி கூறியுள்ளது.
இந்தியா
இது பாஜகவின் சதி என குற்றச்சாட்டு
ஆம் ஆத்மி எம்பி ஸ்வாதி மாலிவாலை தாக்கியதாக டெல்லி முதல்வர் அரவிந்த் கெஜ்ரிவாலின் உதவியாளர் பிபவ் குமார் மீது டெல்லி போலீசார் வியாழக்கிழமை எஃப்ஐஆர் பதிவு செய்தனர்.
மேலும், இதனால் அவரது காலில் பலத்த அடிபட்டாதாகவும் எஃப்.ஐ.ஆரில் தெரிவிக்கப்பட்டுள்ளது.
இந்நிலையில், இந்த குற்றச்சாட்டுக்கு எதிராக ஒரு வீடியோவை வெளியிட்டிருக்கும் ஆம் ஆத்மி, எஃப்.ஐ.ஆரில் குறிப்பிட்டிருப்பது போல் அவர் தாக்கப்பட்டிருந்தால், அவரால் நடக்கவே முடிந்திருக்காது என்று கூறியுள்ளது.
அரவிந்த் கெஜ்ரிவால் மற்றும் ஆம் ஆத்மிக்கு எதிரான சதியின் ஒரு பகுதியாக ஸ்வாதி மாலிவால் பாஜக தலைவர்களுடன் தொடர்பில் இருப்பதாக ஆம் ஆத்மி கட்சியின் தலைவர் சவுரப் பரத்வாஜ் குற்றம் சாட்டியுள்ளார்.