மற்றுமொரு தொழிலதிபர் வீட்டு திருமணம்: விஜய் மல்லையாவின் மகனுக்கு இந்த வாரம் திருமணம்!
தப்பியோடி தற்போது லண்டனில் தலைமறைவாக உள்ள தொழிலதிபர் விஜய் மல்லையாவின் மகன் சித்தார்த்தா மல்லையா தனது நீண்ட நாள் காதலியான ஜாஸ்மினை திருமணம் செய்ய உள்ளார். இன்ஸ்டாகிராமில் ஒரு பதிவில், சித்தார்த் மல்லையா ஜாஸ்மினுடன் ஒரு புகைப்படத்தைப் பகிர்ந்து கொண்டு, "திருமண வாரம் தொடங்கிவிட்டது.." என்று தலைப்பிட்டு தனது திருமணத்தை பற்றி அறிவித்தார். சித்தார்த் மல்லையா தனது காதலிக்கு கடந்தாண்டு ஹாலோவீன் அன்று ப்ரொபோஸ் செய்தார். இதனையும் தனது இன்ஸ்டா பதிவு மூலம் உலகிற்கு அறிவித்தார் சித்தார்த். முன்னாள் மாடல் அழகியான ஜாஸ்மின், சித்தார்த் உடன் நீண்ட நாட்களாக காதலில் உள்ளதாக கூறப்படுகிறது. முன்னதாக சித்தார்த் பாலிவுட் நடிகையான தீபிகா படுகோன்-ஐ சில காலம் காதலித்தார் என்பதும் குறிப்பிடத்தக்கது.
யார் இந்த சித்தார்த் மல்லையா?
முன்னாள் நடிகரும் மாடலுமான சித்தார்த் மல்லையா முதலில் ஐபிஎல் அணியின் ஆர்சிபி இயக்குநராக வெளியுலகிற்கு அறிமுகமானார். சித்தார்த், கலிபோர்னியாவின் லாஸ் ஏஞ்சல்ஸில் பிறந்தார். அவர் லண்டன் மற்றும் ஐக்கிய அரபு எமிரேட்ஸில் வளர்ந்தார். பின்னர் அவர் வெலிங்டன் கல்லூரி மற்றும் லண்டனின் குயின் மேரி பல்கலைக்கழகத்தில் படித்து பட்டம் பெற்றார். நடிப்பின் மீது இருந்த ஆர்வம் காரணமாக ராயல் சென்ட்ரல் ஸ்கூல் ஆஃப் ஸ்பீச் அண்ட் டிராமாவில் பயிற்சி பெற்றார். ட்ராமா ஸ்கூலில் பட்டம் பெற்ற அவர், தொடர்ந்து ஒரு மாடலாகவும் நடிகராகவும் பணியாற்றத் தொடங்கினார். அவர் பாலியல் நகைச்சுவைத் திரைப்படமான பிரம்மன் நாமன் உட்பட பல திரைப்படங்கள் மற்றும் தொலைக்காட்சி நிகழ்ச்சிகளில் தோன்றியுள்ளார். இதுமட்டுமின்றி, அவர் கின்னஸின் சந்தைப்படுத்தல் மேலாளராக பணியாற்றினார்.
