சல்மான் கான் வீட்டின் மீது துப்பாக்கி சூடு நடத்திய மர்மநபர்கள் குஜராத்தில் கைது
செய்தி முன்னோட்டம்
பாலிவுட் நடிகர் சல்மான் கானின் வீட்டில் துப்பாக்கிச்சூடு நடத்திய சம்பவத்தில் தொடர்புடைய இரு குற்றவாளிகளை, மும்பை குற்றப்பிரிவு போலீஸார் திங்கள்கிழமை, குஜராத்தில் உள்ள பூஜ் நகரில் கைது செய்தனர்.
குற்றம் சாட்டப்பட்டவர்கள் பீகாரின் மேற்கு சம்பாரண் மாவட்டத்தில் உள்ள மசிஹியைச் சேர்ந்த விக்கி சாஹப் குப்தா, 24, மற்றும் சாகர் ஸ்ரீஜோகேந்திர பால், 21, என அடையாளம் காணப்பட்டனர்.
சல்மான் கானின் வீட்டிற்கு வெளியே, துப்பாக்கிச் சூடு நடத்திய இந்த இருவரையும், இன்று காலை மும்பைக்கு அழைத்து வந்து விசாரணை நடத்தவுள்ளனர்.
கடந்த ஞாயிற்றுக்கிழமை அதிகாலை 5 மணியளவில் பாந்த்ராவில் உள்ள கேலக்ஸி அடுக்குமாடி குடியிருப்புக்கு வெளியே பைக்கில் வந்த இருவர், நான்கு ரவுண்டுகள் துப்பாக்கியால் சுட்டுவிட்டு, தப்பி ஓடிவிட்டனர்.
கேங்க்ஸ்டர் தொடர்பு
தாக்குதலுக்கு பொறுப்பேற்ற லாரன்ஸ் பிஷ்னோயின் சகோதரர்
துப்பாக்கிச் சூடு நடத்தியபிறகு, குற்றம் சாட்டப்பட்டவர்கள் தங்கள் பைக்கை ஒரு தேவாலயத்தின் அருகே விட்டுவிட்டு, சிறிது தூரம் நடந்து, பாந்த்ரா ரயில் நிலையம் சென்று பின்னர் குஜராத்திற்கு தப்பி சென்றுள்ளனர்.
அந்த துப்பாக்கி சூட்டில் யாருக்கும் காயம் ஏற்படவில்லை எனினும், அது மும்பை வட்டாரத்தை பரபரப்பிற்கு உள்ளாகியுள்ளது.
இந்த சம்பவத்திற்கு, லாரன்ஸ் பிஷ்னோயின் சகோதரர் அன்மோல் பிஷ்னோய், சமூக வலைதள பதிவில் பொறுப்பேற்றுள்ளார்.
சிறையில் இருக்கும் கேங்க்ஸ்டர் லாரன்ஸ் பிஷ்னோய் மற்றும் தேடப்படும் கும்பல் கோல்டி ப்ரார் ஆகியோர் சல்மான் கானைக் கொல்வதாக பலமுறை அறிவித்தனர் என்பது குறிப்பிடத்தக்கது.
1998 பிளாக்பக் வேட்டை சம்பவத்தின் காரணமாக லாரன்ஸ் பிஷ்னோய் கும்பல் சல்மான் கானை குறிவைத்து வருகிறது.
பிளாக்பக்ஸ் பிஷ்னோய் சமூகத்தால் புனிதமானதாகக் கருதப்படுகிறது.