கங்குவா படத்தின் இதுவரையிலான வசூல் எவ்வளவு? அதிகாரப்பூர்வமாக அறிவித்தது படக்குழு
இயக்குனர் சிறுத்தை சிவா இயக்கத்தில் நடிகர் சூர்யா நடிப்பில் மிகவும் எதிர்பார்க்கப்பட்ட திரைப்படமான கங்குவா சமீபத்தில் திரையரங்குகளில் வெளியாகியது. படம் வெளியாவதற்கு பல்வேறு தாமதங்கள் இருந்தபோதிலும், இது மிகப்பெரிய வெற்றிப்படமாக இருக்கும் என படக்குழு கூறி எதிர்பார்ப்பை அதிகப்படுத்தியது. உலகம் முழுவதும் பல்வேறு மொழிகளில் வெளியிடப்பட்ட இந்த படம், சூர்யாவின் நடிப்பில் இரண்டு ஆண்டுகளுக்கு பிறகு வரும் முதல் படமாகும். இதனால் ரசிகர்களிடையே மிகப்பெரிய எதிர்பார்ப்பு இருந்து வந்தது. இந்நிலையில், வெளியீட்டுக்கு முன் கொடுக்கப்பட்ட எதிர்பார்ப்புக்கு முற்றிலும் மாறாக மோசமான விமர்சனங்களை பெற்று வருகிறது. அதன் திரைக்கதை மீதான விமர்சனங்களுக்கு மத்தியில், படத்தின் பாக்ஸ் ஆபிஸ் வசூல் குறித்த தகவலை படக்குழு வெளியிட்டுள்ளது.
ரூ.2,000 கோடி வசூலை எட்டுமா படக்குழு?
இந்த திரைப்படத்தின் தயாரிப்பு நிறுவனமான ஸ்டுடியோ கிரீன் வெளியிட்டுள்ள எக்ஸ் பதிவில், கங்குவா படம் ₹58.62 கோடிகளை சம்பாதித்ததாக அதிகாரப்பூர்வமாக அறிவித்தது. இருப்பினும், இந்த எண்ணிக்கை முதல் நாளுக்கான வசூல் மட்டுமா அல்லது இரண்டு நாட்களுக்கான ஒட்டுமொத்த வசூலா என்பதை படக்குழு குறிப்பிடவில்லை. முன்னதாக, இப்படம் உலகளவில் ₹2,000 கோடி வசூலிக்கும் என்று தயாரிப்பாளர் ஞானவேல்ராஜா கணித்திருந்த நிலையில், அதில் கால் பங்காவது வசூலானால் போதும் என்று படக்குழு நினைப்பதாகக் கூறப்படுகிறது. இதற்கிடையே, தியேட்டரில் சத்தம் அதிகமாக இருப்பதாக கூறப்பட்ட நிலையில், தியேட்டர் ஆடியோவை இரண்டு புள்ளிகளால் குறைக்க தயாரிப்புக் குழு கூறியுள்ளது.
