மகேஷ் பாபு- ராஜமௌலி படத்தில் பிரித்விராஜ் இணையவுள்ளதாக தகவல்
இயக்குனர் ராஜமௌலி RRR படவெற்றிக்கு பின்னர் அடுத்ததாக தெலுங்கு சூப்பர்ஸ்டார் மகேஷ் பாபு உடன் இணைந்துள்ளார். 'SSMB 29' என பெயரிடப்பட்டுள்ள இந்த படத்தில் தற்போது முக்கிய வேடத்தில் மலையாள நடிகரும், இயக்குனருமான பிரித்விராஜ் நடிக்கவுள்ளதாக தகவல்கள் வெளியாகியுள்ளன. மெகா பட்ஜெட்டில் உருவாகி வரும் இப்படத்தின் நடிகர்கள் தேர்வு செயல்முறை தற்போது நடைபெற்று வருகிறது எனவும், விரைவில் இது சார்ந்த அறிவிப்பு வெளியாகுமெனவும் எதிர்பார்க்கப்படுகிறது. இயக்குனர் ராஜமௌலி பிருத்விராஜுடன் பேச்சுவார்த்தை நடத்தி வருவதாகவும், இப்படத்தில் வில்லனாக நடிக்க வாய்ப்பு இருப்பதாகவும் வட்டாரங்கள் தெரிவிக்கின்றன. SSMB 29 திரைப்படம் பிரபல ஹாலிவுட் திரைப்படமான 'தி இந்தியன் ஜோன்ஸ்' பாணியில் இருக்குமென பேச்சு.
படத்தை பற்றி தயாரிப்பாளர், இயக்குனர் தெரிவிப்பது என்ன?
தயாரிப்பாளர் கே.எல்.நாராயணன் பேசுகையில், "படத்தில் கதைக்களம் ஆப்பிரிக்கா உட்பட பல்வேறு இடங்களில் நகர்கிறது. படத்திற்காக வியட்நாமில் இருந்தும் ஃபைட்டர்களை வரவழைத்துள்ளோம்" என்றார். இந்த ஆண்டின் தொடக்கத்தில், ராஜமௌலி ஜப்பானில் 'ஆர்ஆர்ஆர்' திரையிடலில் கலந்து கொள்ள சென்றார். அவர் ஜப்பான் ஊடகத்தினரிடம் 'SSMB 29' பற்றி பேசினார். அவர் கூறுகையில்,"எங்கள் அடுத்த படத்தை எழுதி முடித்துவிட்டோம். படத்திற்கான ப்ரீ புரொடக்ஷன் பணிகளில் இருக்கிறோம். ஆனால், இன்னும் நடிகர் நடிகைகள் தேர்வு முடிவடையவில்லை. படத்தின் முக்கிய ஹீரோ, கதாநாயகன் மட்டும் தேர்வாகியுள்ளார். அவருடைய பெயர் மகேஷ் பாபு. அவர் ஒரு நல்ல நடிகர், அவர் மிகவும் ஹேண்ட்சம்மாக இருப்பார். படம் நிறைவடைந்ததும் அவரை இங்கே அழைத்து வந்து உங்களுக்கு அறிமுகம் செய்கிறேன்"என்றார்.
