21வது சென்னை சர்வதேச திரைப்பட விழா: சிறந்த நடிகருக்கான விருதை வடிவேலு பெற்றார்
செய்தி முன்னோட்டம்
21வது சென்னை சர்வதேச திரைப்பட விழாவில், சிறந்த நடிகருக்கான விருதை மாமன்னன் திரைப்படத்திற்காக நடிகர் வடிவேலு பெற்றார்.
இந்தோ சினி அப்ரிசியேஷன் ஃபவுண்டேஷன் சார்பில் வருடா வருடம் நடைபெறும், சென்னை சர்வதேச திரைப்பட விழா, இந்த ஆண்டு டிசம்பர் 14ஆம் தேதி முதல் 21 ஆம் தேதி வரை நடைபெற்றது.
இதன் இறுதி விழா, ராயபேட்டை பி.வி.ஆா் சத்யம் திரையரங்கில் நேற்று நடைபெற்றது. இதில் பல்வேறு திரைப்படங்களுக்கு விருதுகள் வழங்கப்பட்டது.
சிறந்த தமிழ் படத்திற்கான விருது இயக்குனர் மந்திர மூர்த்தியின் அயோத்தி திரைப்படத்திற்கும், இரண்டாவது சிறந்த தமிழ் படத்திற்கான விருதை கார்த்திக் சீனிவாசன் இயக்கிய உடன்பால் திரைப்படத்திற்கும் வழங்கப்பட்டது.
வெற்றிமாறனின் விடுதலை 1 திரைப்படம், சிறந்த தமிழ் படத்திற்கான சிறப்பு விருதைப் பெற்றது.
2nd card
விருது வென்ற செம்பி, போர் தொழில் திரைப்படங்கள்
சிறந்த நடிகை, நடிகர்களுக்கான விருதில், மாமன்னன் திரைப்படத்திற்காக சிறந்த நடிகர் விருதை வடிவேலு பெற்றார். சிறந்த நடிகைக்கான விருதை அயோத்தி திரைப்படத்திற்காக பிரீத்தி அஸ்ரானிக்கு வழங்கப்பட்டது.
சிறந்த குழந்தை நட்சத்திரத்திற்கான விருதை, பிரபு சாலமன் இயக்கிய செம்பி திரைப்படத்திற்காக, குழந்தை நட்சத்திரம் நிலா பெற்றார்.
போர் தொழில் திரைப்படத்திற்கு சிறந்த ஒளிப்பதிவிற்கான விருது வழங்கப்பட்டது. இவ்விழாவில் விருது வென்ற திரைப்படங்கள் உட்பட, மொத்தம் பத்து தமிழ் திரைப்படங்கள் திரையிடப்பட்டன.
மேலும், 57 நாடுகளில் இருந்து கிட்டத்தட்ட 126 திரைப்படங்கள் இந்த விழாவில் பங்கேற்றன.
முதல் முறையாக, உலக சினிமா பிரிவில் இந்த ஆண்டு விருதுகள் வழங்கப்பட்டது குறிப்பிடத்தக்கது.
திரைப்பட தயாரிப்பாளர் யுகி சேது தலைமையிலான நடுவர் குழு, விருதுகளுக்கு திரைப்படங்களைத் தேர்வு செய்தது.