பணவீக்கம் 6%-ஐ தாண்டியதால் ரெப்போ வட்டியை 6.25% ஆக உயர்த்துகிறதா ஆர்பிஐ?
செய்தி முன்னோட்டம்
இந்தியாவில் சில்லறை பணவீக்கம் இரண்டு ஆண்டுகளில் இல்லாத வகையில் 6.09 சதவீதமாக உயர்ந்துள்ளதைத் தொடர்ந்து, இந்திய ரிசர்வ் வங்கி (ஆர்பிஐ) தனது ரெப்போ வட்டி விகிதத்தை தற்போதைய 5.50 சதவீதத்திலிருந்து 6.25 சதவீதம் வரை உயர்த்தக்கூடும் என பொருளாதார நிபுணர்கள் கணித்துள்ளனர். கடந்த அக்டோபர் 7 ஆம் தேதி நான்கு ஆண்டுகளுக்கு பிறகு முதல் முறையாக வட்டியை உயர்த்திய ரிசர்வ் வங்கி, வரும் டிசம்பர் 2 முதல் 4 வரை நடைபெறும் நிதிக் கொள்கைக் குழு கூட்டத்தில் மீண்டும் வட்டியை உயர்த்துவது ஏறக்குறைய உறுதியாகியுள்ளது.
கச்சா எண்ணெய்
கச்சா எண்ணெய் $100 உயர்வு மற்றும் உணவு பணவீக்கத்தால் கிராமப்புற நுகர்வில் பாதிப்பு
கடந்த 2024-25 காலகட்டத்தில் மலிவான கச்சா எண்ணெய் மற்றும் குறைந்த உணவு விலைகள் அரசுக்கு கைகொடுத்த நிலையில், இம்முறை சூழல் மிகவும் கடுமையாக உள்ளது.
மத்திய கிழக்கு போர் பதற்றத்தால் கச்சா எண்ணெய் பீப்பாய்க்கு 100 டாலரை நெருங்கியுள்ளதால், அக்டோபரில் இந்தியாவின் வர்த்தக பற்றாக்குறை ஓராண்டு உச்சமான 39.88 பில்லியன் டாலராக உயர்ந்துள்ளது.
மேலும் எல் நினோ மற்றும் பருவமழைக் குறைவால் உணவு பணவீக்கம் 8.94 சதவீதமாக அதிகரித்துள்ளதால் கிராமப்புற மக்களின் வாங்கும் திறன் கடுமையாக பாதிக்கப்படும் என ஆய்வாளர்கள் எச்சரிக்கின்றனர்.
ரூபாய் மதிப்பு சரிவு
ரூபாய் மதிப்பு சரிவும் வெளிநாட்டு முதலீட்டாளர்களின் $23 பில்லியன் நிகர வெளியேற்றமும்
உலகளாவிய நிதிக் கொள்கைகளும் இந்திய பொருளாதாரத்திற்கு கூடுதல் நெருக்கடியை அளிக்கின்றன.
அமெரிக்க பெடரல் ரிசர்வ் வட்டி விகிதங்களை உயர்த்தினால் இந்திய சொத்துக்களின் வருவாய் ஈர்ப்பு குறைந்து மூலதனம் வெளியேறும் அபாயம் உள்ளது.
நடப்பு ஆண்டில் இதுவரை அந்நிய முதலீட்டாளர்கள் 30 பில்லியன் டாலருக்கும் மேல் வெளியேறியுள்ள நிலையில், நிகர வெளியேற்றம் 23 பில்லியன் டாலராக நீடிக்கிறது.
கடந்த மாதம் டாலருக்கு நிகரான ரூபாய் மதிப்பு 97 என்ற வரலாற்று சரிவைத் தொட்ட பிறகு ரிசர்வ் வங்கி தலையீட்டால் மீண்டுள்ள போதிலும், கச்சா எண்ணெய் ஏற்ற இறக்கங்கள் ரூபாய்க்கு தொடர்ந்து அச்சுறுத்தலாக உள்ளன.
ஜிடிபி வளர்ச்சி
7.8% ஜிடிபி வளர்ச்சி அளிக்கும் நம்பிக்கையும் டிசம்பரில் 50 அடிப்படைப் புள்ளி உயர்வு கணிப்பும்
இருப்பினும் ஏப்ரல்-ஜூன் காலாண்டில் நாட்டின் மொத்த உள்நாட்டு உற்பத்தி (ஜிடிபி) 7.8 சதவீதம் வளர்ச்சியடைந்திருப்பதும், முழு ஆண்டு வளர்ச்சி 7 சதவீதத்தை தாண்டும் என்பதும் ரிசர்வ் வங்கிக்கு துணிச்சலான முடிவுகளை எடுக்க உதவுகிறது.
"அதிக பணவீக்கம் என்பது அனைவரின் மீதும் விதிக்கப்படும் வரி" என ஆர்பிஐ ஆளுநர் சஞ்சய் மல்ஹோத்ரா கடந்த மாதம் கூறியிருந்தார்.
எண்ணெய் மற்றும் உணவு விலை அதிர்ச்சிகள் ஒரே நேரத்தில் தாக்குவதால், வரும் டிசம்பர் கூட்டத்தில் ரிசர்வ் வங்கி 50 அடிப்படைப் புள்ளிகள் வரை வட்டியை உயர்த்தக்கூடும் என எச்எஸ்பிசி தலைமைப் பொருளாதார நிபுணர் பிரஞ்சுல் பண்டாரி கணித்துள்ளார்.