20% வளர்ச்சி; ஓலா எலக்ட்ரிக் நிறுவனத்தின் மீது அதிக ஆர்வம் காட்டும் முதலீட்டாளர்கள்
ஓலா எலக்ட்ரிக் மொபிலிட்டி வெள்ளிக்கிழமை (ஆகஸ்ட் 9) மும்பை பங்குச் சந்தையில் வலுவான அறிமுகத்தை மேற்கொண்ட நிலையில், அதன் பங்குகள் திங்கட்கிழமை 20 சதவீதம் உயர்ந்துள்ளன. இது இந்தியாவில் வளர்ந்து வரும் மின்சார வாகன (EV) துறையில் முதலீட்டாளர்களின் நம்பிக்கையை பிரதிபலிக்கிறது. தற்போது 4.8 பில்லியன் அமெரிக்க டாலர்கள் மதிப்புடைய இந்த நிறுவனம், இரு சக்கர வாகனங்களுக்கான உலகின் மிகப்பெரிய சந்தையில் மின்சார வாகனங்களை ஏற்றுக்கொள்வதை பயன்படுத்திக் கொள்ள தயாராக உள்ளது. ஆரம்பத்தில், ஓலா எலக்ட்ரிக் பங்குகள் அதன் ஆரம்ப பொது வழங்கல் (ஐபிஓ) விலையான 76 ரூபாய்க்குத் தொடங்கியது. இருப்பினும், பங்குகள் விரைவாக வேகம் பெற்று, 91.20 ரூபாயாக உயர்ந்து, சந்தையில் உள்ள மற்ற பங்குகளுடன் ஒப்பிடும்போது சிறப்பாகவே செயல்பட்டது.
இந்திய மின்சார வாகன சந்தையில் வலுவான ஆதிக்கம் செலுத்தும் ஓலா
எலக்ட்ரிக் ஸ்கூட்டர் சந்தையில் முன்னணியில் உள்ள ஓலா எலக்ட்ரிக், மின்சார வாகனங்களின் பயன்பாடு படிப்படியாக அதிகரித்து வரும் இந்தியாவில் தனது நிலையை வலுவாக்கி வருகிறது. பங்குச் சந்தையில் ஏற்பட்டுள்ள முன்னேற்ற உணர்வு மற்றும் ஓலாவின் எதிர்கால வளர்ச்சியைச் சுற்றியுள்ள நம்பிக்கை ஆகியவை பங்குகளின் ஈர்க்கக்கூடிய செயல்பாட்டிற்குக் காரணம் என ஆய்வாளர்கள் கூறுகின்றனர். இதற்கிடையே, ஜூலை மாத நிலவரப்படி 39 சதவீத சந்தைப் பங்குடன், ஓலா எலக்ட்ரிக் இந்தியாவின் மின்சார ஸ்கூட்டர் சந்தையில் ஆதிக்கம் செலுத்துகிறது. ஓலா எலெக்ட்ரிக் நிறுவனம் அதன் வருவாய் உயர்ந்து கொண்டிருந்தாலும், இன்னும் லாபம் ஈட்டவில்லை. மார்ச் மாதத்துடன் முடிவடைந்த நிதியாண்டில், நிறுவனத்தின் விற்பனை ஆண்டுக்கு ஆண்டு 90 சதவீதம் அதிகரித்துள்ளது. ஆனால் அதன் இழப்புகளும் 8 சதவீதம் அதிகரித்தன.
