2024 நிதியாண்டின் இரண்டாம் காலாண்டில் இந்தியாவின் ஜிடிபி வளர்ச்சி 5.4% ஆக குறைவு; இரண்டு ஆண்டுகளில் இல்லாத அளவிற்கு வீழ்ச்சி
இந்தியாவின் ஜிடிபி வளர்ச்சி நிதியாண்டு 2024-25 ஜூலை-செப்டம்பர் காலாண்டில் 5.4% ஆக குறைந்தது. இது கிட்டத்தட்ட இரண்டு ஆண்டுகளில் மிகக் குறைவாகும். இது கடந்த ஆண்டு இதே காலத்தில் 8.1% ஆக இருந்தது என்று தேசிய புள்ளியியல் அலுவலகத்தின் (என்எஸ்ஓ) தரவுகள் தெரிவிக்கின்றன. இருந்தபோதிலும், அதே காலாண்டில் சீனாவின் 4.6% வளர்ச்சியை விஞ்சி, வேகமாக வளர்ந்து வரும் பெரிய பொருளாதாரம் என்ற அந்தஸ்தை இந்தியா தக்க வைத்துக் கொண்டது. இதற்கிடையே துறைசார் செயல்திறன் மாறுபட்ட போக்குகளை வெளிப்படுத்தியது. விவசாய ஜிவிஏ 3.5% ஆக உயர்ந்தது. இது கடந்த ஆண்டின் இதே காலகட்டத்தில் 1.7% ஆக இருந்தது.
உற்பத்தித் துறை வீழ்ச்சி
அதே சமயம், உற்பத்தித் துறையின் ஜிவிஏ வளர்ச்சியானது 2.2% ஆக சரிந்தது. இது கடந்த ஆண்டின் இதே காலகட்டத்தில் இருந்த 14.3% இல் இருந்து குறிப்பிடத்தக்க சரிவைக் கண்டுள்ளது. இது உலகப் பொருளாதார அழுத்தங்களுக்கு மத்தியில் இந்தத் துறை எதிர்கொள்ளும் சவால்களை எடுத்துக்காட்டுகிறது. நிதியாண்டு 2024 இன் முதல் பாதியில் (ஏப்ரல்-செப்டம்பர்), ஜிடிபி வளர்ச்சி சராசரியாக 6% ஆக இருந்தது. முந்தைய நிதியாண்டின் இதே காலத்தில் 8.2% ஆக இருந்தது. ஏப்ரல்-ஜூன் காலாண்டு வளர்ச்சி மதிப்பீடு 6.7% ஆக நிலையானதாக இருந்தது. இரண்டாம் காலாண்டின் மந்தநிலை பொருளாதார வேகம் பற்றிய கவலைகளை எழுப்புகிறது. குறிப்பாக உலகளாவிய தலையீடுகள் மற்றும் மந்தமான உற்பத்தி மீட்பு ஆகியவற்றால் இது ஏற்பட்டுள்ளதாக தெரிகிறது.
