ஒரே வாரத்தில் 10 பில்லியன் டாலர் சரிவு! இந்தியாவின் அந்நியச் செலாவணி இருப்புக்கு என்னாச்சு? பின்னணி இதோ!
செய்தி முன்னோட்டம்
இந்தியப் பொருளாதாரத்தின் ஸ்திரத்தன்மையைக் காட்டும் முக்கியக் காரணியாக விளங்கும் நாட்டின் அந்நியச் செலாவணி இருப்பு, நடப்பு வாரத்தில் பெரும் சரிவை சந்தித்துள்ளது. ஜூன் 12 ஆம் தேதியுடன் முடிவடைந்த வாரத்தில், இந்தியாவின் ஒட்டுமொத்த அந்நியச் செலாவணி இருப்பு 9.985 பில்லியன் அமெரிக்க டாலர்கள் குறைந்து, 671.625 பில்லியன் டாலர்களாக வீழ்ச்சியடைந்துள்ளது. நாட்டின் தங்க இருப்பின் மதிப்பில் ஏற்பட்ட பிரம்மாண்ட சரிவே இந்த ஒட்டுமொத்த வீழ்ச்சிக்கு முதன்மைக் காரணம் என்று இந்திய ரிசர்வ் வங்கி (ஆர்பிஐ) வெளியிட்டுள்ள அதிகாரப்பூர்வ புள்ளிவிவரங்கள் தெரிவிக்கின்றன.
தங்க இருப்பு
தங்க இருப்பின் மதிப்பில் ஏற்பட்ட கடும் வீழ்ச்சி
ஆர்பிஐ அறிக்கையின்படி, கடந்த வாரத்தில் இந்தியாவின் தங்க இருப்பு மிகக் கடுமையான மதிப்பிழப்பை சந்தித்துள்ளது. வாராந்திர கணக்கெடுப்பில் தங்க இருப்பின் ஒட்டுமொத்த மதிப்பு 10.754 பில்லியன் டாலர்கள் குறைந்து, 103.821 பில்லியன் டாலர்களாக வீழ்ச்சியடைந்துள்ளது. சர்வதேசச் சந்தையில் தங்கத்தின் விலையில் ஏற்பட்ட ஏற்ற இறக்கங்கள் மற்றும் உலகளாவிய நிதிச் சந்தை மாற்றங்கள் காரணமாகவே, இந்தியாவின் வசம் உள்ள தங்கத்தின் ஒட்டுமொத்த மதிப்பில் இந்த சரிவு ஏற்பட்டுள்ளதாகப் பொருளாதார வல்லுநர்கள் தெளிவுபடுத்துகின்றனர்.
நாணய சொத்துக்கள்
வெளிநாட்டு நாணய சொத்துக்களின் தற்போதைய நிலை
ஒட்டுமொத்த இருப்பு குறைந்த போதிலும், அந்நியச் செலாவணி இருப்பின் மிக முக்கிய அங்கமாக விளங்கும் வெளிநாட்டு நாணய சொத்துக்கள் (Foreign Currency Assets) இந்த வாரத்தில் ஓரளவு உயர்வைக் கண்டுள்ளன. மதிப்பீட்டு வாரத்தில் இந்த சொத்துக்களின் மதிப்பு 846 மில்லியன் டாலர்கள் அதிகரித்து, 544.290 பில்லியன் டாலர்களாக உயர்ந்துள்ளது. அமெரிக்க டாலர் அல்லாத யூரோ, பவுண்ட் மற்றும் யென் போன்ற பிற சர்வதேச நாணயங்களின் மதிப்பில் ஏற்படும் மாற்றங்கள், டாலர் மதிப்பிலான இந்த நாணய சொத்துக்களின் உயர்வில் பிரதிபலித்துள்ளது.
சர்வதேச நாணய நிதியம்
எஸ்டிஆர் மற்றும் சர்வதேச நிதியக இருப்பு நிலவரம்
அந்நியச் செலாவணி இருப்பின் மற்ற கூறுகளான எஸ்டிஆர் மற்றும் சர்வதேச நாணய நிதிய இருப்புகளும் சரிவைச் சந்தித்துள்ளன. சர்வதேச நாணய நிதியத்தில் உள்ள சிறப்பு வரைதல் உரிமைகள் (Special Drawing Rights) 66 மில்லியன் டாலர்கள் குறைந்து, 18.699 பில்லியன் டாலர்களாக மாறியுள்ளது. அதேபோல், சர்வதேச நாணய நிதியத்தில் இந்தியாவின் இருப்பு நிலையும் மதிப்பீட்டு வாரத்தில் 11 மில்லியன் டாலர்கள் சரிவைக் கண்டு, தற்போது 4.815 பில்லியன் டாலர்களாக நிலைபெற்றுள்ளது.
முந்தைய வாரம்
முந்தைய வாரத்தின் ஒட்டுமொத்த இருப்பு மாற்றங்கள்
இதற்கு முந்தைய வாரத்திலும் இந்தியாவின் ஒட்டுமொத்த அந்நியச் செலாவணி இருப்பு சிறிய அளவிலான சரிவைச் சந்தித்திருந்தது குறிப்பிடத்தக்கது. ஜூன் 5 ஆம் தேதியுடன் முடிவடைந்த வாரத்தில், நாட்டின் ஒட்டுமொத்த இருப்பு 711 மில்லியன் டாலர்கள் குறைந்து, 681.610 பில்லியன் டாலர்களாகக் காணப்பட்டது. அதனைத் தொடர்ந்து தற்போதைய வாரத்தில் தங்கத்தின் மதிப்பு பெருமளவில் சரிந்ததால், அந்நியச் செலாவணி இருப்பு நடப்பு ஆண்டில் காணப்பட்ட மிக முக்கியமான சரிவுகளில் ஒன்றை தற்போது பதிவு செய்துள்ளது.