இந்தியாவில் இந்த செப்டம்பரில் வெளியாகவிருக்கும் எஸ்யூவிக்கள்
இந்திய ஆட்டோமொபைல் சந்தையில் தற்போது பிற கார் மாடல்களை விட எஸ்யூவிக்குத் தான் எதிர்பார்ப்பும் தேவையும் அதிகமாக இருக்கிறது. தற்போதைய நிலையில் எஸ்யூவிக்களையே வாடிக்கையாளர்கள் அதிகமாகவும் விரும்புகிறார்கள். இந்த செப்டம்பர் மாதம் எந்தெந்த கார் நிறுவனங்கள் புதிய எஸ்யூவி மாடல்களை வெளியிடவிருக்கின்றன? பார்க்கலாம். ஹோண்டா எலிவேட்: இந்தியாவில் தங்களுடைய புதிய எஸ்யூவியான எலிவேட்டை கடந்த ஜூன் மாதமே அறிமுகப்படுத்திவிட்டது ஹோண்டா. அந்த மாடலை நாளை (செப்டம்பர் 4) வெளியிடவிருக்கிறது அந்நிறுவனம். அதிகபட்சமாக 119hp பவர் மற்றும் 145Nm டார்க்கை வெளிப்படுத்தும், 1.5 லிட்டர் பெட்ரோல் இன்ஜினைக் கொண்ட புதிய எலிவேட் எஸ்யூவியை ரூ.11 லட்சம் விலையில் ஹோண்டா வெளியிடலாம் என எதிர்பார்க்கப்படுகிறது.
பிஎம்டபிள்யூ 2 சீரிஸ் M பெர்ஃபாமன்ஸ் எடிஷன்:
இந்தியாவில் ஏற்கனவே தாங்கள் விற்பனை செய்து வரும் 2 சீரிஸின் M பெர்ஃபாமன்ஸ் எடிஷனை வரும் செப்டம்பர் 7ம் தேதி வெளியிடத் திட்டமிட்டிருக்கிறது பிஎம்டபிள்யூ. 179hp பவர் மற்றும் 280Nm டார்க்கை உற்பத்தி செய்யும், நான்கு சிலிண்டர்கள் கொண்ட, 2.0 லிட்டர், டர்போ பெட்ரோல் இன்ஜினைப் பெறவிருக்கிறது இந்த மாடல். ரூ.47 லட்சம் விலையில் இந்தக் கார் வெளியாகலாம் என எதிர்பார்க்கப்படுகிறது. மெர்சிடீஸ்-பென்ஸ் EQE எஸ்யூவி: மேற்கூறிய தங்களது புதிய EV எஸ்யூவியை வரும் செப்டம்பர் 15ல் இந்தியாவில் வெளியிடவிருக்கிறது மெர்சிடீஸ். இந்தியாவில் இது அந்நிறுவனத்தின் மூன்றாவது EVயாக வெளியாகவிருக்கிறது. அதிகபட்சமாக 590 கிமீ ரேஞ்சு கொண்ட இந்த EVயை, ரூ.1.25 கோடி விலையில் அந்நிறுவனம் வெளியிடலாம் என எதிர்பார்க்கப்படுகிறது.
மஹிந்திரா பொலிரோ நியோ ப்ளஸ்:
இந்தியாவில் அதிகம் எதிர்பார்க்கப்படும் பொலிரோ நியோ ப்ளஸை இந்த மாதம் வெளியிடவிருக்கிறது மஹிந்திரா. ரூ.10 லட்சம் முதல் ரூ.12 லட்சம் வரையிலான விலையில் இந்தப் புதிய எஸ்யூவி வெளியாகலாம் என எதிர்பார்க்கப்படுகிறது. 100hp பவர் மற்றும் 260Nm டார்க்கை உற்பத்தி செய்யக்கூடிய ஒரேயொரு டீசல் இன்ஜினை மட்டுமே இந்த புதிய எஸ்யூவியில் கொடுக்கவிருக்கிறது மஹிந்திரா. வால்வோ C40 ரீசார்ஜ்: இந்தியாவில் ஏற்கனவே விற்பனை செய்யப்பட்டு வரும் XC40 ரீசார்ஜ் (ரூ.56.90 லட்சம்) மாடலை விட சற்றுக் கூடுதலான விலையில் புதிய C40 ரீசார்ஜ் மாடலை நாளை (செப். 4) வெளியிடவிருக்கிறது வால்வோ. மொத்தமாக 408hp பவரை உற்பத்தி செய்யக்கூடிய மோட்டார்கள் மற்றும் 78kWh பேட்டரியை இந்தப் புதிய C40யில் கொடுத்திருக்கிறது வால்வோ.
