502 கிமீ மைலேஜ், லெவல் 2 ADAS வசதியுடன் டாடா கர்வ் EV சீரிஸ் X இந்தியாவில் அறிமுகம்
செய்தி முன்னோட்டம்
இந்தியாவின் முன்னணி வாகன உற்பத்தியாளரான டாடா மோட்டார்ஸ், தனது பிரசித்தி பெற்ற எலக்ட்ரிக் காரான கர்வ் EV-யின் புதிய சீரிஸ் X பதிப்பை இந்தியாவில் விற்பனைக்கு அறிமுகப்படுத்தியுள்ளது. 55 கிலோவாட் பேட்டரி பேக் கொண்டுள்ள இதன் ஆரம்ப விலை ₹16.99 லட்சம் (எக்ஸ்-ஷோரூம்) என நிர்ணயிக்கப்பட்டுள்ளது. இது முற்றிலும் புதிய தலைமுறை கார் அல்ல என்ற போதிலும், வாடிக்கையாளர்களின் வசதிக்கேற்ப வேரியண்ட்டுகளின் அமைப்பிலும் சிறப்பம்சங்களிலும் பல்வேறு முக்கிய மாற்றங்கள் செய்யப்பட்டுள்ளன.
வேரியண்ட்டுகள்
வேரியண்ட்டுகள் மற்றும் எக்ஸ்-ஷோரூம் விலை விவரம்
புதிய சீரிஸ் X வரம்பானது அக்கம்ப்ளிஷ்ட் X 55 (Accomplished X 55), எம்பவர்டு X 55 (Empowered X 55) மற்றும் எம்பவர்டு X 55 #DARK என மூன்று முக்கிய வேரியண்ட்டுகளில் கிடைக்கிறது.
அடிப்படை வேரியண்ட்டான அக்கம்ப்ளிஷ்ட் X 55 ₹16.99 லட்சத்திற்கும், எம்பவர்டு X 55 ₹19.19 லட்சத்திற்கும் விற்பனை செய்யப்படுகின்றன.
இதன் டாப்-எண்ட் #DARK பதிப்பு ₹19.49 லட்சம் எக்ஸ்-ஷோரூம் விலையில் சந்தைப்படுத்தப்பட்டுள்ளது.
மைலேஜ்
பேட்டரி திறன் மற்றும் மைலேஜ் வரம்பு
இந்த மூன்று வேரியண்ட்டுகளிலும் சக்திவாய்ந்த 55 கிலோவாட் பேட்டரி பேக் பயன்படுத்தப்பட்டுள்ளது.
ARAI சான்றளிக்கப்பட்ட கணக்கீட்டின்படி இது ஒருமுறை முழுமையாக சார்ஜ் செய்தால் 502 கிமீ தூரம் வரை பயணிக்கும் வரம்பை வழங்குகிறது.
இதில் உள்ள எலக்ட்ரிக் மோட்டார் 164.7 எச்பி ஆற்றலையும் 215 என்எம் டார்க்கையும் வெளிப்படுத்துகிறது.
மேலும், இது பூஜ்ஜியத்திலிருந்து 100 கிமீ வேகத்தை வெறும் 8.6 வினாடிகளில் எட்டிவிடும் திறன் கொண்டது.
பாதுகாப்பு அம்சம்
உட்புற வசதிகள் மற்றும் ADAS பாதுகாப்பு அம்சம்
காரின் உட்புறத்தில் 12.3-இன்ச் டச்ஸ்கிரீன், 9-ஸ்பீக்கர் JBL ஆடியோ சிஸ்டம், வென்டிலேட்டட் இருக்கைகள் மற்றும் சன்ரூஃப் போன்ற ஆடம்பர வசதிகள் இடம்பெற்றுள்ளன.
பாதுகாப்பை உறுதி செய்ய 6 ஏர்பேக்குகள் மற்றும் மேம்பட்ட லெவல் 2 ADAS தொழில்நுட்பம் வழங்கப்பட்டுள்ளது.
இதில் அடாப்டிவ் க்ரூஸ் கன்ட்ரோல், ஃபார்வர்ட் கொலிஷன் வார்னிங், லேன் கீப் அசிஸ்ட் மற்றும் 360 டிகிரி கேமரா போன்ற நவீன பாதுகாப்பு அம்சங்கள் உள்ளதால் பயணிகளின் பாதுகாப்பு முழுமையாக உறுதி செய்யப்படுகிறது.