இந்தியாவில் புதிய எலெக்ட்ரிக் கார்களை அறிமுகம் செய்யத் திட்டமிடும் லெக்சஸ்?
இந்திய லக்சரி கார் சந்தையில் இரண்டு புதிய எலெக்ட்ரிக் கார்களை வெளியிடத் திட்டமிட்டிருக்கிறது டொயோட்டாவின் துணை நிறுவனமான லெக்சஸ் (Lexus). அந்த இரண்டு கார்களில் முதல் மாடலை 2026ம் ஆண்டு இந்தியாவில் வெளியிடத் திட்டமிட்டிருக்கிறது லெக்சஸ். LF-ZC மற்றும் LF-ZL ஆகிய கான்செப்ட் கார்களின் மூலம் தங்களுடைய மேம்பட்ட தொழில்நுட்பங்களை சமீபத்தில் ஜப்பானில் நடைபெற்று முடந்த ஜப்பான் மொபிலிட்டி நிகழ்வில் காட்சிப்படுத்தியிருந்தது அந்நிறுவனம். அடுத்து அந்நிறுவனம் உருவாக்கவிருக்கும் அத்தனை எலெக்ட்ரிக் மாடல்களுக்கும் அடிப்படையாக இந்த தொழில்நுட்பங்களே அமையவிருக்கின்றன. எரிபொருள் மற்றும் எலெக்ட்ரிக் என பல்வேறு பவர்ட்ரெயின் உருவாக்கத்தில் டொயோட்டா முதலீடு செய்து வரும் நிலையில், 2035ம் ஆண்டிற்குள் எலெக்ட்ரிக் வாகனங்களை மட்டுமே விற்பனை செய்யும் சொகுசு கார் நிறுவனமாக மாறத் திட்டமிட்டிருக்கிறது லெக்சஸ்.
இந்தியாவில் லெக்சஸ் கார்களின் விற்பனை:
2017ம் ஆண்டு இந்தியாவில் அறிமுகப்படுத்தப்பட்டதில் இருந்து கொஞ்சம் கொஞ்சமாக லெக்சஸின் சந்தைப் பங்கு உயர்ந்து வருகிறது. கடந்த இரண்டு ஆண்டுகளாக இந்தியாவில் லெக்சஸின் விற்பனை இருமடங்காகி வருவதாக, லெக்சஸ் இந்தியா நிறுவனத்தின் தலைவர் நவீன் சோனி தெரிவித்திருக்கிறார். எனினும், போட்டியாளர்களை எதிர்கொள்ளும் அளவிற்காக விற்பனையை இந்தியாவில் லெக்சஸ் பெறவில்லை என்றே கூறவேண்டும். இன்னும், லெக்சஸின் விற்பனைத் தகவல்களை, டொயோட்டாவின் அறிக்கையுடன் சேர்த்தே வெளியிட்டு வருகிறது லெக்சஸ். தற்போது வரை இந்தியாவில் பல எஸ்யூவிக்கள், செடான்கள் மற்றும் கூப் மாடல்களை அந்நிறுவனம் வெளியிட்டிருந்தாலும், அனைத்துமே ஹைபிரிட் மாடல்கள் தான் என்பது குறிப்பிடத்தக்கது. 2024ம் ஆண்டு அந்நிறுவனம் வெளியிடத் திட்டமிட்டிருக்கும் எலெக்ட்ரிக் கார் மாடலே, இந்தியாவில் லெக்சஸின் முதல் எலெக்ட்ரிக் காராகும்.
இந்தியாவில் வெளியாகவிருக்கும் லெக்சஸின் எலெக்ட்ரிக் கார்:
ஜப்பான் மொபிலிட்டி நிகழ்வில் காட்சிப்படுத்திய LF-ZC கான்செப்டையே, 2026ம் ஆண்டு இந்தியாவில் தங்களுடைய முதல் எலெக்ட்ரிக் காராக வெளியிடத் திட்டமிட்டிருக்கிறது லெக்சஸ். சுமார் 1000 கிமீ ரேஞ்சைக் கொண்டு வெளியிடப்படவிருக்கும் இந்த மாடலானது, இந்தியாவில் தற்போது விற்பனையில் இருக்கும் ES 300h செடானுக்கு மாற்றாக, ப்ரீமியம் எலெக்ட்ரிக் செடான் பிரிவில் அறிமுகமாகவிருக்கிறது. நிக்கல், மேங்கனீஸ் மற்றும் கோபால்ட் (NMC) செல் பேட்டரியை தங்களுடைய புதிய காரில் பயன்படுத்தத் திட்டமிட்டிருக்கிறது லெக்சஸ். குறைவான இடத்தில், அதிக ரேஞ்சைக் கொடுக்கக்கூடிய திறனைப் பெற்றிருக்கும் இந்த பேட்டரிக்கள், 20 நிமிடத்திலேயே 80% வரை சார்ஜ் ஆகும் திறனையும் கொண்டிருப்பதாகக் கூறப்படுவது குறிப்பிடத்தக்கது.
