Loading...
இருசக்கர வாகன பாதுகாப்பில் புதிய புரட்சி: விபத்து ஏற்பட்டால் தானாக விரியும் ஏர்பேக் ஹெல்மெட் தயாரிக்கும் சீனா
இருசக்கர வாகனத்தில் விபத்து ஏற்பட்டால் தானாக விரியும் ஏர்பேக் ஹெல்மெட் தயாரிக்கும் சீனா

இருசக்கர வாகன பாதுகாப்பில் புதிய புரட்சி: விபத்து ஏற்பட்டால் தானாக விரியும் ஏர்பேக் ஹெல்மெட் தயாரிக்கும் சீனா

எழுதியவர் Vasuki
Nov 18, 2026
07:05 pm

செய்தி முன்னோட்டம்

இருசக்கர வாகன ஓட்டிகளின் பாதுகாப்பை அடுத்த கட்டத்திற்கு எடுத்துச் செல்லும் விதமாக, விபத்து ஏற்படும்போது தானாகவே காற்றுப்பை விரிந்து தலையைப் பாதுகாக்கும் அதிநவீன 'ஏர்பேக் ஹெல்மெட்' ஒன்றை சீனா உருவாக்கி வருகிறது. சீனாவைச் சேர்ந்த 'லான்சி யெமா மோட்டார்சைக்கிள் ஃபிட்டிங்ஸ்' என்ற நிறுவனம் இந்தப் புதிய தலைக்கவசத்தை வடிவமைத்து சோதனை செய்து வருவதாகத் தகவல்கள் வெளியாகியுள்ளன. தற்போது சோதனை மற்றும் மேம்பாட்டு நிலையில் உள்ள இந்தத் தொழில்நுட்பம் குறித்த வீடியோக்கள் சமூக வலைதளங்களில் வைரலாகி, வாகன ஓட்டிகளிடையே பெரும் கவனத்தை ஈர்த்துள்ளது.

தொழில்நுட்பம்

சென்சார்கள் மூலம் செயல்படும் பாதுகாப்பு

வழக்கமான ஹெல்மெட்டுகள் கடினமான வெளிப்புற ஓடு மற்றும் அதிர்வுகளைத் தாங்கும் உள் அடுக்கை மட்டுமே நம்பியுள்ளன.

ஆனால், இந்தப் புதிய வடிவமைப்பில் ஹெல்மெட்டுடன் கூடுதலாக காற்றுப்பை அமைப்பும் இணைக்கப்பட்டுள்ளது.

விபத்து ஏற்படும் தருணத்தை ஹெல்மெட்டில் உள்ள அதிநவீன சென்சார்கள் துல்லியமாகக் கண்டறிந்து, உடனடியாக வாயுவை வெளியேற்றி ஏர்பேக்கை விரியச் செய்யும்.

இதன் மூலம் மோதலின்போது ஏற்படும் கடுமையான அழுத்தம் சமமாகப் பிரிக்கப்பட்டு, நெற்றி மற்றும் தலையின் பக்கவாட்டுப் பகுதிகளில் உயிருக்கு ஆபத்தான காயங்கள் ஏற்படுவது பெருமளவில் தடுக்கப்படும் எனக் கூறப்படுகிறது.

அறிவுறுத்தல்

அடிப்படை சாலை விதிகள் அவசியம்

ஏற்கனவே இருசக்கர வாகன ஓட்டிகளின் கழுத்து மற்றும் முதுகுத்தண்டைப் பாதுகாக்கும் 'ஏர்பேக் ஜாக்கெட்டுகள்' பயன்பாட்டில் உள்ள நிலையில், தற்போது நேரடியாக ஹெல்மெட்டிலேயே ஏர்பேக் பொருத்தும் முயற்சி மேற்கொள்ளப்பட்டுள்ளது.

இருப்பினும், இந்தப் புதிய ஏர்பேக் ஹெல்மெட்டுகள் உரிய பாதுகாப்புச் சான்றிதழ்களைப் பெற்றுச் சந்தைக்கு வரும் வரை, வாகன ஓட்டிகள் தற்போதுள்ள தரச்சான்றிதழ் பெற்ற ஹெல்மெட்டுகளை முறையாக அணிவதே அவசியமாகும்.

மேலும், பாதுகாப்பான வேகத்தைக் கடைப்பிடிப்பது, மது அருந்திவிட்டு வாகனம் ஓட்டுவதைத் தவிர்ப்பது மற்றும் வாகனத்தின் பிரேக், டயர்களை முறையாகப் பராமரிப்பது போன்ற அடிப்படைச் சாலைப் பாதுகாப்பு விதிகளை பின்பற்றுவதே விபத்துகளைத் தவிர்க்க சிறந்த வழியாகும்.

ADVERTISEMENT