பன்னூன் கொலை சதி: இந்தியா முழு ஒத்துழைப்பு அளித்ததாக அமெரிக்க தூதர் பாராட்டு
செய்தி முன்னோட்டம்
காலிஸ்தானி பயங்கரவாதி குர்பத்வந்த் சிங் பன்னூன் கொலைச் சதியைக் குறிப்பிட்டு பேசிய அமெரிக்கத் தூதர் எரிக் கார்செட்டி, இந்திய அரசாங்கம் முழு ஒத்துழைப்பு அளித்ததாக பாராட்டினார்.
அதே சமயம் வெளிநாட்டுப் பிரஜையின் படுகொலையில் எந்த நாடும் அல்லது அரசு ஊழியரும் ஈடுபடக்கூடாது என்று மீண்டும் வலியுறுத்தினார்.
அமெரிக்க மண்ணில், காலிஸ்தான் பயங்கரவாதி குர்பத்வந்த் சிங் பன்னூனைக் கொல்ல முயற்சித்ததாகக் கூறப்படும் குற்றச்சாட்டுகளை விசாரிக்க, இந்தியாவும் அமெரிக்காவும் இணைந்து செயல்படுவதாக இந்தியாவுக்கான அமெரிக்கத் தூதர் எரிக் கார்செட்டி தெரிவித்தார்.
"கேட்டதை எல்லாம்" செய்துவரும் இந்திய அரசாங்கத்தையும் அவர் அப்போது பாராட்டினார்.
செய்தி நிறுவனமான ஏஎன்ஐக்கு அளித்த பிரத்யேக பேட்டியில் அவர் இதை தெரிவித்தார்.
பன்னூன் கொலை சதி
விசாரணை குழு அமைத்த இந்தியா
வன்முறைக்கு நிதியுதவி செய்ததற்காகவும், காலிஸ்தானிகளின் உணர்வுகளை தூண்டியதற்காகவும் பன்னூன் இந்தியாவால் பயங்கரவாதியாக அறிவிக்கப்பட்டுள்ளார்.
பன்னூன் கொலை சதி குறித்து ஆராய, இந்தியா ஒரு கமிஷனை அமைப்பதையும் அமெரிக்க தூதர் பாராட்டினார்.
"சட்டத்தில் அனுபவம் வாய்ந்த மூத்தவர்களை கொண்டு இந்தியா இந்த விசாரணைக் கமிஷனை அமைத்தது. அவர்கள் கொலைக்கான ஆதாரங்களைக் கண்டுபிடிப்பதில் எடுக்கும் முயற்சிகளை பார்த்து நான் மிகவும் மகிழ்ச்சியடைந்தேன்" என்று எரிக் கார்செட்டி கூறினார்.
அமெரிக்கவில் நடைபெற்ற சதி என்பதினால் மட்டுமல்ல, வேறு ஏதேனும் ஒரு நாட்டின் குடிமகனைக் கொல்ல முயற்சி நடந்திருந்தாலும், அமெரிக்கா இதே போன்ற நடவடிக்கைகளை எடுத்திருக்கும் என்று அவர் மேலும் கூறினார்.
இதுபோன்ற நிகழ்வுகள் இந்தியாவிற்கும் அமெரிக்காவிற்கும் இடையிலான இருதரப்பு உறவுகளை பாதிக்கும் என்ற கூற்றுகளையும் அவர் மறுத்தார்.