'இஸ்ரேலின் பலமிக்க நண்பன் இந்தியா': அமெரிக்காவுக்கு நெதன்யாகுவின் சாட்டையடி பதில்
செய்தி முன்னோட்டம்
மத்திய கிழக்கு பிராந்தியத்தில் போர் நிறுத்த உடன்படிக்கை தொடர்பாக அமெரிக்கா மற்றும் இஸ்ரேல் இடையே கருத்து வேறுபாடுகள் அதிகரித்துள்ள நிலையில், அமெரிக்கா மட்டுமே இஸ்ரேலின் ஒரே கூட்டாளி அல்ல என்றும், தங்களுக்கு இந்தியா போன்ற பலமிக்க நட்பு நாடுகள் இருப்பதாகவும் இஸ்ரேல் பிரதமர் பெஞ்சமின் நெதன்யாகு தெரிவித்துள்ளார். அமெரிக்கத் துணை அதிபர் ஜே.டி.வென்ஸ் அண்மையில் இஸ்ரேலை விமர்சித்து பேசியதற்கு பதிலடி கொடுக்கும் வகையில், பாக்ஸ் நியூஸ் ஊடகத்திற்கு அளித்த பேட்டியில் நெதன்யாகு இதனைத் தெரிவித்துள்ளார்.
இந்தியா
"இந்தியா என்றொரு பெரிய நாடு எங்களுக்கு உள்ளது"
அமெரிக்காவுடன் அமைதி ஒப்பந்தம் தொடர்பாக தங்களுக்கு கருத்து வேறுபாடுகள் இருப்பதை ஒப்புக்கொண்ட நெதன்யாகு, அமெரிக்காவைத் தாண்டி இஸ்ரேலுக்கு பரந்த சர்வதேச ஆதரவு இருப்பதைச் சுட்டிக்காட்டினார். "எங்களுக்கு வெள்ளை மாளிகையை தாண்டி வேறு சில நண்பர்களும் இருக்கிறார்கள். இந்தியா என்ற ஒரு 'சிறிய' நாடு உள்ளது. 1.4 பில்லியன் (140 கோடி) மக்கள் தொகையை கொண்ட அந்த நாட்டில் இஸ்ரேலுக்கு மிகப் பிரம்மாண்டமான ஆதரவு குவிந்து வருகிறது" என்று நெதன்யாகு சற்றே கிண்டலாக குறிப்பிட்டுள்ளார். மேலும், உலகின் பல்வேறு நாட்டு தலைவர்களும் தன்னிடம் பேசி இஸ்ரேலின் செயற்கை நுண்ணறிவு (AI) மற்றும் சைபர் பாதுகாப்பு தொழில்நுட்பங்களை தங்களுக்கு கற்றுத் தருமாறு கோரி வருவதாகவும் அவர் கூறினார்.
எச்சரிக்கை
அமெரிக்கத் துணை அதிபர் ஜே.டி.வென்ஸ் எச்சரிக்கை
முன்னதாக, அமெரிக்கா மற்றும் ஈரான் இடையே எட்டப்பட்டுள்ள போர் நிறுத்த உடன்படிக்கையை விமர்சித்து வரும் இஸ்ரேலிய அமைச்சரவைக்கு ஜே.டி.வென்ஸ் கடுமையான எச்சரிக்கை விடுத்திருந்தார். "இஸ்ரேல் அரசாங்கம் தங்களின் ஒரே சக்திவாய்ந்த கூட்டாளியான அமெரிக்காவை தாக்குவதை நிறுத்த வேண்டும். இஸ்ரேலின் பாதுகாப்பு ஆயுதங்களில் மூன்றில் இரண்டு பங்கு அமெரிக்க மக்களின் வரிப்பணத்தில் உருவானவை. வெறும் 9 மில்லியன் (90 லட்சம்) மக்கள் தொகையை கொண்ட இஸ்ரேல், எல்லாப் பாதுகாப்பு பிரச்சினைகளையும் வன்முறை மற்றும் படுகொலைகள் மூலமாகவே தீர்த்துவிட முடியாது. அதிபர் டொனால்ட் ட்ரம்பின் அமைதிப் பேச்சுவார்த்தைக்கு இஸ்ரேல் மதிப்பளிக்க வேண்டும்" என்று வென்ஸ் குறிப்பிட்டிருந்தார்.
மோதல்
லெபனான் விவகாரத்தில் தொடரும் மோதல்
ஹெஸ்பொல்லா அமைப்பினரை குறிவைத்து லெபனான் தலைநகர் பெய்ரூட்டின் குடியிருப்புப் பகுதிகளில் இஸ்ரேல் நடத்தும் வான்வழித் தாக்குதல்களுக்கு அமெரிக்கா தனது கடுமையான கண்டனத்தை பதிவு செய்துள்ளது. அமெரிக்கா-ஈரான் இடையேயான பேச்சுவார்த்தை இறுதி கட்டத்தை எட்டும் போதெல்லாம், இஸ்ரேல் நடத்தும் குண்டுவெடிப்புகள் அமைதிச் சூழலை கெடுப்பதாக ட்ரம்ப் நிர்வாகம் அதிருப்தி அடைந்துள்ளது. இருப்பினும், தங்களை அழிக்க நினைக்கும் பயங்கரவாதிகளிடம் இருந்து தங்களை பாதுகாத்துக் கொள்ளவும், மேற்கத்திய நாகரிகத்தைக் காப்பாற்றவுமே இஸ்ரேல் தொடர்ந்து போரிட்டு வருவதாக நெதன்யாகு தனது தரப்பு நியாயத்தை மீண்டும் வலுவாக முன்வைத்துள்ளார்.